Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 105 Hüküm no: 27 Orijinal metin no: [5a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Müteferrika Hüseyin Ağa b. Ahmed’in alacak hususunda Hüseyin Efendi b. Abdülmümin aleyhine açtığı davada iddiasını ispat edemediği Vilâyet-i Rumeli’nde Prizrin kasabasından olup mahmiye-i İstanbul’da Kurşunlu Han’da sâkin Dergâh-ı âlî müteferrikalarından Hüseyin Ağa b. Ahmed meclis-i şer‘-i hatîrde işbu sâhibü’l-kitâb Hüseyin Efendi b. Abdülmü’min mahzarında üzerine takrîr-i da‘vâ edip mezkûr Hüseyin Efendi bin altmış beş senesinde Suhorika kādısı olduğu hâlde mezkûr Hüseyin Efendi’ye bir husûsun husûlü için otuz kıt‘a riyâlî guruş def‘ ve teslîm edip ol dahi yedimden ahz u kabz eylemişdi lâkin husûlü müyesser olmamağla hâlâ suâl olunup meblağ-ı mezkûrun alıverilmesin taleb ederim dedikde gıbbe’s-suâl [5b] ve akībe’l-inkâr müdde‘î-i mezkûr[dan] <> müdde‘âsını mübeyyine beyyine taleb olundukda ityân-ı beyyineden izhâr-ı acz ile istihlâf edicek mezkûr Hüseyin Efendi’ye minvâl-i muharrer üzere müdde‘î-i mezkûrun mâlından ve yedinden otuz kıt‘a riyâlî guruşu ahz u kabz etmediğine ve bu vechile üzerinde ve kıbelinde müdde‘î-i mezkûrun hakkı olmadığına yemîn teklîf olundukda ol dahi hasbe’l-mes’ûl yemîn billâhi’l-aliyyi’l-azîm edicek müdde‘î-i mezkûr Hüseyin Ağa bilâ-beyyine mu‘ârazadan men‘ olunup mâ-hüve’l-vâki‘ bi’t-taleb ketb olundu. Fi’l-yevmi’s-sâbi‘min şehri Ramazâni’l-mübârek li-sene seb‘a ve sittîn ve elf. Şühûdü’l-hâl: Mustafa Efendi el-kâtib, Mustafa Efendi b. Muharrem, İsa Bey b. Ahmed, el-Hâc Ca‘fer ve gayruhüm.