Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 105 Hüküm no: 28 Orijinal metin no: [5b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sinan Ağa b. Mehmed’in Angeli kazasındaki bazı emlakını Receb Ağa’ya sattığı bazısının da kullanım hakkını devrettiği Vilâyet-i Rumeli’nde Angeli[kasrı] kazâsına tâbi‘ Gorya nâm karye sâkinlerinden zahrü’l-emsâl Sinan Ağa b. Mehmed meclis-i şer‘-i hatîr-i lâzimü’t-tevkīrde işbu bâ‘isü’l-vesîka umdetü’l-emâcid ve’l-a‘yân makbûlü’s-sudûr ve’l-erkân Receb Ağa b. ( ) mahzarında ikrâr ve takrîr-i kelâm edip silk-i mülkümde münselik olup karye-i mezbûrede vâki‘ lede’l-ahâlî ve’l-cîrân ma‘lûmü’l-hudûd yirmi dört bâb odaları müştemil çiftlik ta‘bîr olunur mülk menzilimi bi-cümleti’t-tevâbi‘ ve’l-levâhık ve kâffeti’l-hukūk ve’l-merâfık ve içinde mevcûd olan iki çift ve otuz altı karasığır ve iki yüz kırk keyl buğday ve yüz yirmi keyl arpa ve on keyl yulaf ve sâir âlât-ı zirâat ve esbâb-ı harâseti ile ve yine kazâ-i mezbûra tâbi‘ İstronişte nâm karyede vâki‘ kezâlik lede’l-ahâlî ve’l-cîrân ma‘lûmü’l-hudûd olup dâhilen ve hâricen sekiz bâb odaları hâvî çiftlik ta‘bîr olunur mülk menzilimi bi-cümleti’t-tevâbi‘ ve’l-levâhık ve içinde mevcûd sekiz çift ve yirmi dört öküzümü ve der-anbar olan mahsûlâtından yüz altmış keyl buğday ve seksen keyl arpa ve yirmi keyl yulaf ve çiftlik-i mezbûr ile ma‘an isti‘mâl olunur sâir âlât-ı zirâat ve esbâb-ı harâseti tarafeynden îcâb ve kabûlü hâvî bey‘-i bâtt-ı sahîh-i şer‘î ile sekiz yüz elli kıt‘a riyâlî guruşa bi-safkatin vâhidetin mezbûr Receb Ağa’ya bey‘ ol dahi vech-i muharrer üzere iştirâ ve kabûl eyledikden sonra zikrolunan Gorya karyesinde vâki‘ mevâzi‘-i müteferrikada olup herbirinin hudûdu lede’l-ahâlî ve’l-cîrân ma‘lûme tahmînen bin iki yüz keyl tohum isti‘âb eder tarlalarımın dahi hakk-ı tasarrufunu bin beş yüz kıt‘a riyâlî guruş bedel mukābilesinde ma‘rifet-i sâhib-i arz ile mezbûr Receb Ağa’ya ferâğ ve tefvîz ol dahi ba‘de’l-kabz yine zikri mürûr eden İstronişte karyesinde mevâzi‘-i adîdede vâki‘ herbirinin hudûdu [lede’l]-ahâlî ve’l-cîrân ma‘lûme olup tahmînen sekiz yüz keyl tohum isti‘âb eder tarlalarımın dahi hakk-ı tasarrufunu ma‘rifet-i sâhib-i arz mezbûr Receb Ağa’ya bin kıt‘a riyâlî guruş bedel mukābilesinde ferâğ ve tefvîz ol dahi vech-i muharrer üzere tefevvüz ve kabûl eyledikden sonra semeni olan meblağ-ı mezbûr sekiz yüz elli riyâlî guruş ile zikri mürûr eden tarlaların bedel-i tefvîzi olan iki bin beş yüz riyâlî guruş ki cem‘an üç bin üç yüz elli riyâlî guruşu mezbûr Receb Ağa’nın sâbıkā Trablusşam beylerbeyisi olan Abdi Paşa zimmetinde cihet-i deyn-i şer‘îden hakkı olan altı bin yedi yüz riyâlî guruş hakkına ben işbu hâzır bi’l-meclis Süleyman Ağa b. Ali le ma‘an emr ve kabûlü hâviye kefâlet-i sahîha-i şer‘iyye ile kefîl olmağla meblağ-ı mezbûr altı bin yedi yüz guruşun nısfı olan üç bin üç yüz elli riyâlî guruşu cihet-i kefâletinden mezbûr Receb Ağa’ya zimmetimde edâsı lâzım deyn olmağla meblağ-ı merkūm üç bin üç yüz elli riyâlî guruşa takās edip mezbûr Receb dahi minvâl-i muharrer üzere mukāssa ve kabûl eyledikden sonra emlâk-i mezbûre ile arâzi-i mersûme mahallinde kabz ve tasarrufa mezbûr Receb Ağa’yı taslît eyledim dedikde gıbbe’t-tasdîkı’l-mu‘teber kazâ-i mezbûra tâbi‘ Nehor nâm karye sükkânından umdetü’l-a‘yân Süleyman Ağa b. Ali nâm kimesne emlâk-i mezbûrenin ve arâzi-i mersûmenin derkine kefâlet-i sahîha-i şer‘iyye ile kefîl olmağın mâ-vaka‘a bi’t-taleb ketb olundu. Fi’l-yevmi’s-sâmin min şehri Ramazâni’l-mübârek li-sene seb‘a ve sittîn ve elf. Şühûdü’l-hâl: Umdetü’l-a‘yân Mehmed Ağa kethüdâ efendi hâlâ, Zahrü’l-kuzât Mustafa Efendi b. Bâli, Ahmed Çelebi b. Abdullah, Ali Efendi b. Abdullah, Ali Efendi b. Sinan ve gayruhüm mine’l-[hâzırîn.]