Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 106 Hüküm no: 29 Orijinal metin no: [5b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Münir v. Piri’nin alacak hususunda Marat’ın oğulları Serkiz, Kasper ve Yoseb ile sulh olduğu Medîne-i Haleb’de Mahalle-i cedîd sükkânından olan Münir v. Pîrî nâm Ermeni meclis-i şer‘-i hatîrde Acem tüccarından çulhalı tâifesinden olup mahmiye-i İstanbul’da Tahta Han’da sâkin olup kendi kıbellerinden asîl ve li-ebeveyn karındaşları olup tarafından husûs-ı âti’l-beyânı sulh ve ibrâya vekîl olup vekâletleri şer‘an sâbite olan Kasper ve Serkiz veledey Marat nâm Ermeniler mahzarlarında tav‘an ikrâr ve i‘tirâf edip târih-i kitâbdan on beş ay mukaddem ale’l-iştirâk merkūmân Kasper ve Serkiz ve müvekkilleri merkūm Yoseb’e medîne-i İzmir’de yedimden ve malımdan bin sekiz yüz kırk dört riyâlî guruş ikrâz ve teslîm edip mezbûrlar dahi iktirâz ve kabzla deynleri olmağla taleb eylediğimde mezbûrlar deyn-i merkūmu i‘tirâflarından sonra benim üzerime sana üç bin yüz kırk riyâlî guruş kıymetli beş denk hâm ipeğimizi îdâ‘ ve teslîm eyledik deyu da‘vâ ve taleb ettiklerinde ben dahi vech-i meşrûh üzere zikrolunan beş denk ipeği istîdâ‘ ve kabzımı inkâr ile beynimizde münâza‘ât-ı kesîre vâkı‘a olmuşidi el-hâletü hâzihî beynimizde muslihûn tavassut edip merkūmûn ile beni meblağ-ı mezkûr da‘vâsından üç yüz riyâlî guruş üzerine sulh eylediklerinde ben dahi sulh-ı mezbûru kabûl ve bedel-i sulh olan meblağ-ı mezbûru meclis-i sulhda mezbûrûn yedlerinden tamâmen ahz u kabz edip bâkīsi da‘vâsından mezbûrûnun zimmetlerini ibrâ-i âmm-ı kātı‘u’n-nizâ‘la ibrâ ve ıskāt [6a] eyledim min ba‘d merkūmûn Yoseb ve Kasper ve Serkiz üzerlerine meblağ-ı mezbûra müte‘allika bi-vechin mine’l-vücûh ve sebebin mine’l-esbâb da‘vâ ve hakkım yokdur dedikde mukırr-ı mezbûru vech-i meşrûh üzere cârî ve sâdır olan ikrârında el-mukarru lehümâ’l-mezbûrân dahi bi’l-müvâcehe tahkīk ve bi’l-müşâfehe tasdîk edicek mâ-hüve’l-vâki‘ bi’t-taleb ketb olundu. Fi’l-yevmi’s-sâbi‘ min şehri Ramazâni’l-mübârek li-sene seb‘a ve sittîn ve elf. Şühûdü’l-hâl: Mehmed Çavuş b. Mustafa, Mustafa Çelebi b. Ferhad el-keylî, İsa Bey Çelebi b. Ferhad, Hâcı Hüseyin b. Hasan ve gayruhüm.