Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 107 Hüküm no: 30 Orijinal metin no: [6a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merhum Mehmed Ağa’nın Ali Efendi b. Kaya’da olan alacağı hususunda varislerinden karısı Fatma ile kızı Ümmühani’nin sulh oldukları Havâss-ı aliyye muzâfâtından Çakmaklı nâm karye sâkinlerinden iken mukaddemâ vefât eden Mehmed Ağa b. Abdullah’ın verâseti zevce-i metrûkesi Fâtıma bt. Mehmed’e ve sulbî kebîr oğulları Ali ve İsmail’e ve sulbiye kebîre kızları Afîfe ve Ümmühani’ye münhasıra olup kable’l-kısme mezbûr İsmail vefât edip verâseti vâlidesi mezbûre Fâtıma ile li-ebeveyn er karındaşı mezbûr Ali’ye ve li-ebeveyn kız karındaşları mezbûretân Afîfe ve Ümmühani’ye ve li-üm kız karındaşı Safiye bt. Ahmed’e münhasıra olduğu şer‘an zâhir ve mütehakkık oldukdan sonra mezbûretân Fâtıma ve Ümmühani meclis-i şer‘-i hatîr-i lâzimü’t-tevkīrde işbu bâ‘isü’l-vesîka mefharü erbâbi’t-tahrîr ve’l-kalem Ali Efendi b. Kaya mahzarında herbiri ikrâr ve i‘tirâf edip mûrisimiz müteveffâ-yı mezbûr Mehmed Ağa hâl-i hayâtında mezbûr Ali Efendi’ye otuz altı bin fıddî râyic fi’l-vakt akçe îdâ‘ ve teslîm mezbûr Ali Efendi dahi ba‘de’l-istîdâ‘ ve’t-tesellüm kendi masârıfına sarf ve istihlâk meblağ-ı mezbûr zimmetinde deyn oldukdan sonra meblağ-ı mezbûru merkūm Mehmed Ağa kable’l-ahz vefât eyledikde irsen verese-i mezbûrûna isâbet ve intikāl etmekle meblağ-ı mezbûrdan bi-hükmi’l-münâsahati’ş-şer‘iyye ikimize isâbet eden on üç bin iki yüz elli akçe hissemizin üç bin beş yüz seksen iki akçesini mezbûr Ali Efendi yedinden ahz u kabz edip bâkī kalan dokuzbinaltı yüz altmış sekiz akçeyi vermekde te‘allül etmeğin taleb ve da‘vâ eylediğimizde beynimizde münâza‘ât-ı kesîre ve muhâsamât-ı şedîde cereyânından sonra vesâtat-ı muslihîn ile da‘vâ-yı mezbûreden mezkûr Ali Efendi bizimle yedi bin beş yüz akçe üzerine inşâ-i akd-i sulh eyledikde biz dahi sulh-ı mezbûru kabûl eleyip ol vechile bedel-i sulh olan meblağ-ı mezbûr yedi bin beş yüz akçe mezbûr Ali Efendi zimmetinde kalmışdı hâlâ bedel-i sulh-ı mezbûr yedi bin beş yüz akçeyi mezbûr Ali Efendi tamâmen bize def‘ ve teslîm ve biz dahi yedinden ahz u kabz edip husûs-ı mezbûra müte‘allika cemî‘ de‘âvî ve mutâlebât ve eymân ve muhâsamâtdan mezbûr Ali Efendi’nin zimmetini ibrâ-i âmm-ı kātı‘u’n-nizâ‘la ibrâ ve ıskāt eyledik min ba‘d mezbûr Ali Efendi ile vechen mine’l-vücûh ve sebeben mine’l-esbâb da‘vâ ve nizâ‘ımız kalmadı eğer ba‘de’l-yevm husûs-ı mezbûra müte‘allika da‘vâ bizden bi’l-asâle veyâ vekîlimizden bi’l-vâsıta mezbûr Ali üzerine sudûr ve zuhûr ederse lede’l-hükkâmi’l-kirâm mesmû‘a olmaya dediklerinde gıbbe’t-tasdîkı’l-mu‘teber mâ-hüve’l-vâki‘ bi’t-taleb ketb olundu. Fi’l-yevmi’s-sâbi‘ min şehri Ramazâni’l-mübârek li-sene seb‘a ve sittîn ve elf. Şühûdü’l-hâl: Mehmed Çavuş b. Musa, Mehmed Efendi el-imâm, Hâcı Hasan, Veli b. Mahmud, Siyavuş b. Abdullah, Mustafa Çelebi el-müezzin, Ebûbekir Ağa, Bayram Bey, Mehmed b. Abdullah, Yusuf b. Abdullah.