Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 108 Hüküm no: 31 Orijinal metin no: [6a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Efendi b. Hasan Paşa’nın merhum Vezîriazam Mehmed Paşa’da olan üç bin guruş alacağının Seyyid Hacı Matuk Çelebi b. Hacı Abdülvehhab’a havale edildiği Bi’l-fi‘il medîne-i Halebü’ş-şehbâ’da mesned-ârâ-yı seccâde-i resûl-i güzîn ve sadr-nişîn-i makām-ı şer‘-i mübîn olan a‘lemü’l-ulemâ’i’l-izâm efdalü’l-fuzalâ’i-fihâm Mustafa Efendi b. Hasan Paşa kıbelinden unvânı ile mu‘anven ve hatemi ile mahtûm ve târih-i kitâb senesi Cumâdelâhıresi’nin yirmi üçüncü günü ile müverrah nakl-i şer‘î vârid olup mazmûnu zümre-i tüccârdan olup [medîne-i] mezbûre sükkânından umdetü’l-a‘yân zübdetü’l-erkân es-Seyyid Hâcı Matûk Çelebi b. el-Hâc Abdülvehhâb’dan meşhûdün-bih-i âti’l-beyân vechi üzere da‘vâ-yı sahîha-i şer‘iyye ile mesbûk istişhâd-ı şer‘î sudûrundan sonra Dergâh-ı âlî dâme mahfûfen bi’l-me‘âlî müteferrikalarından iftihârü’l-emâcid ve’l-ekârim Mehmed Ağa b. Abdulbâki Ağa b. Nasûh Ağa ve fahrü’l-emâsil ve’l-a‘yân Ahmed Bey b. Mehmed Bey b. Abdullah nâm kimesneler nakl ve tahvîl için mahall-i cerh ve ta‘dîle li-ecli’ş-şehâde hâzırân olup sâbıkā vezîr-i a‘zam olan Mehmed Paşa’nın müsteşhid-i mezbûr el-Hâc Matûk Çelebi’ye cihet-i deyn-i şer‘îden üç bin yedi yüz kıt‘a riyâlî kebîr guruş deyni olmağla mezbûr Mehmed Paşa meblağ-ı mezbûru bin altmış altı senesi Şa‘bânü’l-mu‘azzamının on dördüncü gününde bundan akdem vefâtı mesmû‘ olup terekesi mahmiye-i İstanbul’da veresesi yedinde mazbût olan Kapıcılar Kethüdâsı Mustafa Ağa’dan hayâtında bizim huzûrumuzda üçü bir meclisde iken îcâb-ı muhîl ve kabûl-i muhtâl ve rızâ-yı muhtallun-aleyhi hâviye havâle etmeğin müsteşhid-i mezbûr Hâcı Matûk Çelebi’nin mezkûr Mehmed Paşa zimmetinde mütekarrir olan üç bin yedi yüz riyâlî guruş hakkı mezbûr Mustafa Ağa üzerine nakl olunmağla meblağ-ı mezbûrun yedi yüz riyâlî guruşu mezkûr Mustafa Ağa hayâtında bi-hükmi’l-havâle mezbûra def‘ ve teslîm ol dahi ahz u tesellüm edip meblağ-ı bâkī-i mezbûru mezkûr Mustafa Ağa [edâ] etmedin zimmetinde iken vefât etmekle tereke-i vâfiyyesinden meblağ-ı bâkī-i mezbûru üç bin guruşu müsteşhid-i mezbûr için hakk-ı taleb ve ahz vardır biz bu husûsa bu vech üzere şâhidleriz şehâdet dahi ederiz deyu herbiri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağı müştemil bulunmağın kitâb-ı merkūm, müsteşhid-i mezbûr es-Seyyid Hâcı Matûk Çelebi talebiyle müteveffâ-yı mezbûrun sulbî kebîr oğlu ve terekesine vâzı‘u’l-yed olan Mehmed Ağa’yı dîvân-ı ma‘delet-unvânında ma‘kūd olan mahfil-i kazâya ihzâr ve mahzarında kitâb-ı merkūm feth u kırâat ve istintâk olundukda cevâbında tereke-i müteveffâ-yı mezbûra vaz‘-ı yed eylediğini ikrâr ve lâkin kitâb-ı mezbûrun mevlânâ-yı mûmâ-ileyh kıbelinden vürûdunu inkâr edicek müsteşhid-i mezbûrdan sıdk-ı makāline beyyine taleb olundukda şühûd-ı tarîkden olup isimleri zeyl-i kitâbda [6b] mektûb olan Müslimînden iftihârü’s-sâdât Seyyid Yahya Çelebi b. İzzeddin ve el-Hâc Murad b. Abdürrezzâk ve Nasrullah Beşe b. el-Hâc Ömer nâm kimesneler li-ecli’ş-şehâde meclis-i şer‘a hâzırân olup isre’l-istişhâd fi’l-vâki‘ işbu kitâb-ı nakli mezkûr-ı mûmâ-ileyh Mustafa Efendi b. Hasan Paşa’nın olup biz[im] huzûrumuzda imzalayıp ve mühür urup ol vechile zeylindeki hat ve zahrındaki hateme mûmâ-ileyh Mustafa Efendi bizi işhâd eyledi biz bu husûsa bu vech üzere şâhidleriz şehâdet dahi ederiz deyu herbiri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’ş-şer‘î mûcebince ba‘de’l-hükm mâ-vaka‘a bi’t-taleb ketb olundu. Tahrîren fî gurreti şehri Ramazâni’l-mübârek li-sene seb‘a ve sittîn ve elf. Şühûdü’l-hâl: Umdetü’l-a‘yân Mehmed Ağa b. Abdülvehhâb, Hüseyin Çelebi el-Halebî, Kasım Çelebi el-cündi, Derviş Çelebi el-mübâşir, Ali Beşe çukadâr, Ahmed Çelebi ve gayruhüm.