Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 109 Hüküm no: 32 Orijinal metin no: [6b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mühtedi Mehmed b. Abdullah’ın Papa Tino aleyhine açtığı alacak davasında iddiasını ispat edemediği Medîne-i Galata a‘mâlinden kasaba-i Kasımpaşa’da Tatavla mahallesi ahâlîsinden Mehmed b. Abdullah nâm mühtedi meclis-i şer‘-i hatîr-i lâzimü’t-tevkīrde mahalle-i mezkûrede vâki‘ kenîsede hâlâ rûhbân olan Papa Tino v. İstemad nâm râhib mahzarında üzerine takrîr-i da‘vâ edip bundan akdem Nasârâ tâifesinin patriği iken katl olunan Partinos nâm râhib hâl-i hayâtında ben şeref-i İslâm ile müşerref olmazdan mukaddem zikrolunan kenîsede rûhbân olduğumda alâ tarîkı’r-rüşve benden iki yüz yirmi riyâlî guruş ahz u kabz edip ben dahi meblağ-ı mezkûru mezbûr Partinos’dan hâl-i hayâtında taleb eylediğimde onun dahi mezbûr Papa Tino zimmetinde cihet-i deyn-i şer‘îden iki yüz yirmi riyâlî guruş hakkı olup vech-i muharrer üzere zimmetinde benim hakkım olan meblağ-ı mezkûr iki yüz yirmi guruş mezbûr Papa Tino zimmetinde cihet-i mezkûreden hakkı olan iki yüz yirmi guruşa üçümüz bir yerde iken rızâlarımız ile mezbûr Papa Tino’dan havâle-i sahîha-i şer‘iyye ile havâle edip ol dahi minvâl-i meşrûh üzere havâle-i mezkûreyi kabûl eyledikden sonra cihet-i havâleden zimmetinde hakkım olan meblağ-ı mezkûrun mezbûr Papa Tino’dan taleb eylediğimde vermede te‘allül eder suâl olunup alıverilmesi matlûbumdur dedikde gıbbe’s-suâl mezbûr Papa Tino husûs-ı mezkûru bi’l-külliyye inkâr edicek müdde‘î-i mezbûrdan müdde‘âsını mübeyyine beyyine taleb olundukda ikāmet-i beyyineden izhâr-ı acz edip istihlâf etmeğin mezbûr Papa Tino’ya meblağ-ı mezkûr iki yüz yirmi guruş vech-i muharrer üzere kendiye havâle olunup cihet-i havâleden üzerinde müdde‘î-i mezbûr Mehmed’in hakkı olmadığına müdde‘î-i mezkûr talebiyle yemîn teklîf olundukda ol dahi alâ vefki’l-mes’ûl yemîn billâhi’l-lezî enzele’l-İncîle alâ İsa aleyhisselâm edicek müdde‘î-i mezbûr Mehmed ale’l-kavli’l-muhtâr müdde‘âsını isbât edinceye değin mu‘ârazadan men‘ olunup mâ-hüve’l-vâki‘ bi’t-taleb ketb olundu. Tahrîren fi’l-yevmi’s-sâdis min şehri Ramazâni’l-mübârek li-sene seb‘a ve sittîn ve elf. Şühûdü’l-hâl: Mehmed Bey b. Ahmed, Receb Çavuş b. Abdullah, Mehmed Bey b. Abdullah el-bevvâb, İsa Bey b. Ahmed ve gayruhüm mine’l-[hâzırîn.]