Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 110 Hüküm no: 33 Orijinal metin no: [6b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Ramazan’ın aldığı borç karşılığında menzilini Mehmed b. Ahmed’e rehin verdiği Mahmiye-i İstanbul’da Ali Paşa-yı atîk mahallesi sâkinelerinden Âişe bt. Ramazan nâm hâtun meclis-i şer‘-i hatîr-i lâzimü’t-tevkīrde Mehmed b. Ahmed nâm sagīrin tesviye-i umûruna savb-ı şer‘-i enverden mansûbe vasîsi olan vâlidesi sâhibetü hâze’l-kitâb Bağcinân bt. Abdullah nâm hâtun mahzarında tav‘an ikrâr ve i‘tirâf edip zikri âtî akdin sudûruna değin silk-i mülk-i sahîhimde münselik mülk ve hakkım olup mahalle-i mezbûrede vâki‘ bir tarafdan Kazzâz İbrahim mülküne ve bir tarafdan Hasan Efendi mülküne ve bir tarafdan Kazgancızâde sarayına ve bir tarafdan tarîk-ı âmma müntehî olup dâhiliye ve hâriciye büyût-i müte‘addideyi müştemil olan cemî‘ mülk menzilimi kâffe-i hukūk ve merâfıkı ile merkūme Bağcinân’a yüz otuz beş riyâlî guruşa târih-i kitâbdan on gün tamâmına değin tarafeynden îcâb ve kabûlü hâvî bey‘ bi’l-vefâ ile bey‘ ve teslîm edip merkūme Bağcinân Hâtun dahi sagīr-i mezbûr için bi’l-vesâye iştirâ ve kabûl ve tesellüm ettikden sonra semen-i merkūm yüz otuz beş riyâlî guruşu sagīr-i mezbûr mâlından zimmetimde deyn olan yüz otuz beş riyâlî guruşa takās eylediğimden mâ‘adâ meblağ-ı mezbûr yüz otuz beş riyâlî guruşu ecel-i mezkûr hulûlünde dahi merkūma def‘ ve teslîm etmez isem menzil-i mezbûru semen-i misline bey‘a ve kabz-ı semene ve deyn-i merkūmu merkūme Bağcinân’a edâ ve teslîme ve deyn-i merkūmdan fazla kalırsa bana îsâle işbu hâzır bi’l-meclis Hasan Ağa b. Sinan tarafımdan azl ve in‘izâlden masûn vekâlet-i devriyye-i sahîha ile vekîl ve menâbıma nâib ta‘yîn eyledim dedikde merkūm Hasan Ağa dahi vekâlet-i mezbûreyi kabûl ve hizmet-i lâzımesin edâya müte‘ahhid olmağın mâ-hüve’l-vâki‘ bi’t-taleb ketb olunup men lehü’t-taleb yedine def‘ olundu. Fi’l-yevmi’s-sâmin min şehri Ramazâni’l-mübârek li-sene seb‘a ve sittîn ve elf. Şühûdü’l-hâl: Ahmed Çavuş b. Zülfikar, Mustafa Efendi b. Muharrem, Kutucu Hüseyin Çelebi b. Abdullah, Koyuncu Mehmed Çelebi, Ahmed Çelebi b. ( ) kethüdâ-yı koyuncuyân, Koyuncu Mustafa, İbrahim b. Ömer, İsmail Çelebi.