Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 111 Hüküm no: 34 Orijinal metin no: [6b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Piyale Bey b. Abdullah’ın Panayot v. Todori’ye borcu olduğunu ikrar ettiği Mahmiye-i İstanbul’da Çarşanbapazarı kurbünde bakkal tâifesinden işbu bâ‘isü’s-sifr Panayot v. Todori nâm zimmî mahfil-i kazâda Piyale Bey b. Abdullah mahzarında üzerine da‘vâ ve takrîr-i kelâm edip mezkûr Piyale Bey zimmetinde müşterâ ve makbûz ve mikdârı beynimizde ma‘lûm asel ve revgan-ı sâde semenlerinden bin sekiz yüz akçe hakkım vardır hâlâ taleb ederim suâl olunsun dedikde gıbbe’s-suâl mezbûr Piyale Bey cevâbında fi’l-hakīka minvâl-i muharrer üzere müdde‘î-i mezkûra müşterâ ve makbûz ve mikdârı beynimizde ma‘lûm asel ve revgan-ı sâde semenlerinden zimmetimde ancak bin yedi yüz elli akçe lâzimü’l-edâ deynim vardır deyu ziyâdeyi inkâr edicek müdde‘î-i mezkûrdan ziyâde müdde‘âsını mübeyyine beyyine taleb olundukda ityân-ı beyyineden [izhâr-ı acz edip] istimhâl etmeğin mehl-i şer‘î ile imhâl olundukdan sonra ikrârı mertebesi olan bin yedi yüz elli akçeyi müdde‘î-i merkūma edâ ve îfâya mezkûr Piyale Bey üzerine ilzâm-ı şer‘î olunup mâ-hüve’l-vâki‘ bi’t-taleb ketb olundu. Fi’l-yevmi’s-sâbi‘ min şehri Ramazâni’l-mübârek li-sene seb‘a ve sittîn ve elf. Şühûdü’l-hâl: Mustafa Efendi b. Muharrem, İsa Bey b. Ahmed, Ca‘fer Bey b. Abdullah ve gayruhüm.