Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 112 Hüküm no: 35 Orijinal metin no: [7a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Keresteci Polihoroni v. Panayot’un tasarrufunda olan bazı vakıf emlakı İbrahim Hanzâde Ahmed Bey’e kiraya verdiği Mahmiye-i İstanbul’da Kumkapısı’nda Kürkçübaşı Süleyman Ağa mahallesi ahâlîsinden keresteci tâifesinden Polihoroni v. Panayot nâm zimmî meclis-i şer‘-i hatîr-i lâzimü’t-tevkīrde işbu kitâb-ı sıhhat-nisâbın sâhibi İbrahim Hânzâde demekle şehîr umdetü’l-emâcid ve’l-ekârim zübdetü’l-mehâmid ve’l-mekârim Ahmed Bey tarafından ikrâr-ı âti’l-beyânı tasdîka vekîl olup bi-mâ hüve nehcü’s-sübût şer‘an vekâleti sâbite olan fahrü’l-akrân Ömer Ağa b. Osman mahzarında tav‘an ikrâr ve i‘tirâf edip zikri âtî tefvîzin sudûruna değin taht-ı yedimde ve tasarrufumda olup mahmiye-i mezkûrede vâki‘ merhûm Dârü’s-sa‘âde Ağası Mehmed Ağa Evkāfı’ndan olup merhûm ve mağfûrun-leh Ebû’l-feth Sultân Mehmed Hân Câmi‘-i şerîfi kurbünde Küçükkaraman sûkunda vâki‘ lede’l-ahâlî ve’l-cîrân ma‘lûmü’l-hudûd olup icâre-i mu‘accele-i ma‘lûme ve yevmî on bir akçe icâre-i müeccele ile tasarrufumda olan on dört bâb fevkānî odaları ve altında vâki‘ sekiz bâb dükkânı târih-i kitâbdan üç yüz altmış gün tamâmına değin tefvîz bi’l-vefâ tarîkı üzere müvekkil-i mûmâ-ileyh Ahmed Bey’e ma‘rifet-i mütevellî-i vakf-ı mezkûr ile bin dört yüz riyâlî guruşa ferâğ ve tefvîz edip onlar dahi minvâl-i muharrer üzere tefevvüz ve kabûl eyleyip bedel-i ferâğ olan meblağ-ı mezkûr bin dört yüz guruşu müşârun-ileyh Ahmed Bey zikrolunan on dört bâb odalar ile sekiz bâb dükkânı ba‘de’t-tahliyeti’ş-şer‘iyye ve’t-tekābuzı’l-mer‘î târih-i kitâb şehri gurresinden ayda bin üç yüz elli akçeye bana îcâr ve teslîm edip ben dahi vech-i muharrer üzere istîcâr ve kabz ve tesellüm eyledim dedikde mukırr-ı mezkûr Polihoroni’yi vech-i muharrer üzere cârî ve sâdır olan ikrârında vekîl-i mezkûr Ömer Ağa vicâhen ve şifâhen tahkīk edicek mâ-hüve’l-vâki‘ bi’t-taleb ketb olundu. Tahrîren fi’l-yevmi’s-sâdis min şehri Ramazâni’l-mübârek li-sene seb‘a ve sittîn ve elf. Şühûdü’l-hâl: Hüseyin Efendi imâm-ı Behram Çavuş, Osman Ağa [b.] Keyvan, el-Hâc Mustafa b. Abdullah, Osman Çelebi el-müezzin, İbrahim Çelebi b. Halil el-müezzin, Ahmed Çelebi ve gayruhüm.