Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 112 Hüküm no: 36 Orijinal metin no: [7a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nasuh b. Fatma’nın Mustafa b. Mehmed’e Opar kazasındaki bazı emlakini sattığı bazısının da kullanım hakkını devrettiği Vilâyet-i Rumeli’nde Opar kazâsına tâbi‘ Nikari nâm karyede sâkine iken vefât eden Fâtıma bt. Abdullah nâm hâtunun verâseti sulbî kebîr oğlu Nasûh ile sulbiye kebîre kızı Hâlide nâm hâtuna münhasıra olduğu ve tereke-i müteveffât-ı mezkûre li’z-zekeri mislü hazzi’l-ünseyeyn ikisine isâbet eylediği şer‘an mütehakkık oldukdan sonra mezkûr Nasûh meclis-i şer‘-i hatîr-i lâzimü’t-tevkīrde karye-i mezkûreden işbu râfi‘ü[’l-kitâb] Mustafa b. Mehmed mahzarında tav‘an ikrâr ve i‘tirâf edip vâlidem müteveffât-ı mezkûre Fâtıma’nın terekesinden olup karye-i mezkûrede vâki‘ bir tarafdan Hasan b. Yusuf mülküne ve bir tarafdan İbrahim b. Abdullah mülküne ve bir tarafdan Mustafa Bey b. Abdullah mülküne ve bir tarafdan bazen Mehmed b. Abdullah mülküne ve bazen tarîk-ı âmma müntehî olup iki bâb tahtânî odayı ve bahçesi ve havluyu müştemil olan üç sehimden benim hisseme isâbet eden iki sehm-i şâyi‘inin bir sehm-i şâyi‘ini kâffe-i hukūk ve merâfıkıyla ve yine vâlidem müteveffât-ı mezkûrenin terekesinden olup karye-i mezkûre bağları hilâlinde vâki‘ lede’l-ahâlî ma‘lûmü’l-hudûd olan sekiz kıt‘a bağdan benim hisseme isâbet eden iki sehminden bir sehm-i şâyi‘imi kâffe-i hukūk ve merâfıkıyla bi-safkatin vâhidetin mezbûr Mustafa’ya iki bin fıddî râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ edip ol dahi minvâl-i muharrer üzere iştirâ ve kabûl eyledikden sonra vâlidem müteveffât-ı mezkûre Fâtıma’nın tasarrufunda olup ba‘de vefâtihâ tasarrufu intikāl-i âdî ile bana intikāl edip karye-i mezkûre hudûdu dâhilinde mevâzi‘-i adîdede vâki‘ hudûdu beynimizde ilm-i şer‘î ile ma‘lûm altı kıt‘a tarlalardan nısf-ı şâyi‘iyle hakk-ı tasarrufunu ma‘rifet-i sâhib-i arz ile mezkûr Mustafa’ya bin akçe bedel mukābilesinde ferâğ ve tefvîz edip ol dahi minvâl-i muharrer üzere tefevvüz ve kabûl eyleyip semen-i mezkûr iki bin akçe ile bedel-i ferâğ olan bin akçeyi mezkûr Mustafa yedinden tamâmen ahz u kabz eylediğimden sonra emlâk-ı mezkûre ile arâzi-i mezbûreyi mahallinde zabt u tasarrufu mezkûr Mustafa’yı taslît eyledim dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Tahrîren fi’l-yevmi’s-sâdis min şehri Ramazâni’l-mübârek li-sene seb‘a ve sittîn ve elf. Şühûdü’l-hâl: Hüseyin b. Ali, Hasan b. Mehmed, Hüseyin b. Abdullah, Nasûh b. Mehmed, Sefer b. Hasan, Mustafa b. Mehmed, İlyas b. Ahmed, Mehmed b. Kasım ve gayruhüm.