Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 113 Hüküm no: 37 Orijinal metin no: [7a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Aleksi v. Yorgi’nin eşya bedelinden İsrail v. Şemail’e olan borcunu taksitle ödemeyi taahhüt ettiği Mahmiye-i İsta[nbul’da] Lanka kurbünde bakkal tâifesinden Aleksi v. Yorgi nâm zimmî meclis-i şer‘-i hatîr-i lâzimü’t-tevkīrde mahmiye-i mezkûrede çukacı tâifesinden İsrail v. Şemail nâm Yahudi muvâcehesinde tav‘an ikrâr ve i‘tirâf edip bundan akdem mezbûr İsrail’den her zirâ‘ı yedişer buçuk riyâlî guruşa olmak üzere iştirâ ve kabz eylediğim on zirâ‘ benefş çuka semeninden yetmiş riyâlî guruş ve beşer guruşa olmak üzere beş zirâ‘ mor londrine çuka semeninden yirmi beş riyâlî guruş ve sekizer guruş bir rub‘ guruşa olmak üzere beş zirâ‘ erguvanî çuka semeninden kırk iki buçuk guruş ve ikişer guruşa olmak üzere üç zirâ‘ erguvanî atlas semeninden altı guruş ve bir erguvanî çuka ve bez çakşırı semeninden beş guruş ki cem‘an yüz elli iki guruş deynim olup meblağ-ı mezbûru merkūm İsrail’e def‘aten edâya kudretim olmamağın her ayda beşer riyâlî guruş vermek üzere târih-i kitâbdan otuz buçuk ay tamâmına değin taksît eyledikde ben dahi vech-i muharrer üzere olan taksîti kabûl edip minvâl-i meşrûh üzere meblağ-ı mukassata-ı mezkûr İsrail’e zimmetimde lâzimü’l-edâ ve vâcibü’l-kazâ deynimdir dedikde mukırr-ı mezbûr Aleksi’yi vech-i [muharrer] üzere cârî ve sâdır olan ikrârında el-mukarru lehü’l-mezkûr İsrail vicâhen tasdîk ve şifâhen tahkīk edicek mâ-hüve’l-vâki‘ bi’t-taleb ketb olundu. Tahrîren fi’l-yevmi’l-hâmis min şehri Ramazâni’l-mübârek li-sene seb‘a ve sittîn ve elf. Şühûdü’l-hâl: Müstakīm Çavuş el-mübâşir, Mustafa Çavuş b. Receb, Ali Bey b. Ahmed, İsmail b. Yunus ve gayruhüm mine’l-[hâzırîn.]