Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 116 Hüküm no: 40 Orijinal metin no: [7b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Penbe bt. Niko’nun İslamî usullere göre kocası Miho v. Niko’dan boşandığı Vilâyet-i Rumeli’nden Avlonya sancağında Argirikasrı kazâsına tâbi‘ Garbş (Grabş) nâm karyede sâkine Penbe bt. Niko nâm Nasrâniye li-ebeveyn karındaşı ve vekîli Liko nâm zimmî meclis-i şer‘-i hatîr-i lâzimü’t-tevkīrde kız karındaşı mezkûre Penbe’nin hâlâ zevci olup mahmiye-i İstanbul’da ekmekçi tâifesinden Miho v. Niko nâm zimmî muvâcehesinde üzerine takrîr-i da‘vâ edip mezkûr Miho zevcesi kız karındaşım mezkûre Penbe’yi bin altmış altı senesinde vâki‘ rûz-ı Kasım’a değin karye-i mezkûrede varıp görmez isem zevcem mezkûre Penbe ile İslâm şer‘i üzere boş olsun deyu zevcesi müvekkilem mezkûre Penbe’nin talâkını karye-i mezkûreye varıp görmemeğe şart ve ta‘lîk edip hâlâ karye-i mezkûreye varma[ma]ğla kız karındaşım mezkûre Penbe zevci mezkûr Miho’dan mutallaka olmuşdur suâl olunsun dedikde gıbbe’s-suâl mezkûr Miho cevâbında fi’l-vâki‘ bin [altmış] altı senesinde vâki‘ rûz-ı Kasım’da karye-i mezkûreye varıp zevcem mezkûre Penbe’yi görmezsem mezkûr Penbe benden İslâm şer‘i üzere boş olsun deyu şart ve ta‘lîk etmişidim lâkin karye-i mezkûreye varmağa iktidârım olmadı deyu vech-i muharrer üzere şart ve ta‘lîkini ve karye-i mezkûreye varmadığını tav‘an ikrâr ve i‘tirâf etmeğin ikrâr mûcebince zevce-i mezkûre Penbe’nin talâkına hüküm birle mâ-hüve’l-vâki‘ bi’t-taleb ketb olundu. Tahrîren fi’l-yevmi’t-tâsi‘ min şehri Ramazâni’l-mübârek li-sene seb‘a ve sittîn ve elf. Şühûdü’l-hâl: Sinan b. Ali, İsa Bey b. Ahmed, İsmail Çelebi b. Yunus ve gayruhüm mine’l-huzzâr.