Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 117 Hüküm no: 42 Orijinal metin no: [8a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Ağa b. Abdülmennan’ın menzilini bin guruşa Süleyman Çelebi b. Halil’e sattığı Bi’l-fi‘il Rumeli kādıaskeri olan a‘lemü’l-ulemâ’i’l-mütebahhirîn efdalü’l-fuzalâ’i’l-müteverri‘în yenbû‘u’l-fezâil menbû‘u’l-efâzil Sun‘îzâde es-Seyyid Mehmed Emin Efendi hazretlerinin hâlâ kethüdâları olan umdetü’l-emâcid ve’l-a‘yân Mehmed Ağa b. Abdülmennân meclis-i şer‘-i hatîr-i lâzimü’t-tevkīrde işbu râfi‘ü’l-kitâb Süleyman Çelebi b. Halil mahzarında tav‘an ikrâr ve i‘tirâf edip zikri âtî akdin sudûruna [dek] silk-i mülkümde muntazam yedimde mülk ve hakkım olup mahmiye-i İstanbul’da Debbâğ Yunus mahallesinde vâki‘ bir tarafdan merhûm Muslı Efendi Vakfı’na ve bir tarafdan mahalle-i mezkûre imâmına meşrûta vakıf menzile ve bir tarafdan Medîne-i Münevvere Vakfı’ndan Usta Kavuk tasarrufunda olan vakıf menzile ve bir tarafdan tarîk-ı âmma müntehî olup dâhiliyesi iki bâb fevkānî oda ve iki matbahı ve bir çardağı ve bir su kuyusunu ve cüneyneyi ve hâriciyesi iki fevkānî ve bir tahtânî odaları ve bir musluğu ve bahçe ve kenîfi müştemil olan cemî‘ mülk menzilimi kâffe-i hukūk ve merâfıkıyla mezkûr Süleyman Çelebi’ye bin riyâlî guruşa tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm edip ol dahi vech-i meşrûh üzere iştirâ ve tesellüm eyledikden sonra semeni olan meblağ-ı mezkûr bin riyâlî guruşu mezkûr Süleyman Çelebi yedinden tamâmen ahz u kabz eyledim ba‘de’l-yevm menzil-i mahdûd-ı mezkûr mezbûr Süleyman Çelebi’nin mülk-i müşterâsı ve hakk-ı sırfıdır keyfe mâ yeşâ ve yahtâr mutasarrıf olsun dedikde mukırr-ı mezkûr Mehmed Ağa’yı vech-i muharrer üzere cârî ve sâdır olan ikrârında el-mukarru lehü’l-mezkûr Süleyman Çelebi vicâhen tasdîk ve şifâhen tahkīk edicek mâ-hüve’l-vâki‘ bi’t-taleb ketb olundu. Tahrîren fi’l-yevmi’s-sâmin min şehri Ramazâni’l-mübârek li-sene seb‘a ve sittîn ve elf. Şühûdü’l-hâl: Abdullah Efendi b. Mehmed el-imâm, Receb Çelebi b. Şa‘ban el-mütevellî, Şa‘ban b. Mehmed, Bâli Beşe b. ( ), Ali Beşe b. Mehmed odabaşı, el-Hâc Abdulbâki b. ( ), Hüseyin b. Hızır, el-Hâc Ebûbekir b. Abdülkadir.