Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 117 Hüküm no: 43 Orijinal metin no: [8a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Karagöz Mehmed Paşa’nın Bergos’taki çiftliğini yüz bin akçeye satın alan Hüseyin Ağa b. Ali ile Karagöz Paşa’nın varisleri arasında çıkan anlaşmazlıkta otuz bin akçe üzerine sulh oldukları Dâru’l-hilâfeti’l-aliyye Kostantıniyye el-mahmiyye’de Karabaş mahallesinde sâkin olup bundan akdem mağdûben katl olunan merhûm Karagöz Mehmed Paşa’nın verâseti zevce-i metrûkesi fahrü’l-muhadderât Fâtıma Hânım bt. el-vezîru’l-a‘zam ve’d-düstûru’l-ekrem Nişancı Mustafa Paşa’ya ve babası Ramazan Çelebi’ye ve sulbî sagīr oğlu Mustafa Bey’e ve sulbiye sagīre kızı Âişe Hânım’a münhasıra olduğu şer‘an zâhir ve müte‘ayyin oldukdan sonra sagīre-i mezbûre Âişe Hânım’ın tesviye-i umûruna kıbel-i şerî‘at-i mergūbeden mansûb vasîsi olan mûmâ-ileyh Mustafa Paşa hazretleri tarafından husûs-ı âti’l-beyânı ikrâra vekîl olup vekâleti hasm-ı câhid-i şer‘î mahzarında mefhareyi’l-akrân Ahmed Ağa b. Ali ve Ahmed b. Mehmed nâm kimesneler şehâdetleri [ile] şer‘an sâbite olan Mustafa Ağa b. Abdullah nâm kimesne vekâleten ve sagīr-i mezbûr Mustafa Bey’in dahi tesviye-i umûruna kıbel-i şer‘den mansûb vasîsi olan Mustafa Efendi b. Ahmed vesâyeten meclis-i şer‘-i şerîf-i şâmihu’l-imâd ve mahfil-i dîn-i münîf-i râsihu’l-evtâdda işbu bâ‘isü’l-vesîka Hüseyin Ağa b. Ali mahzarında herbiri ikrâr-ı tâm ve takrîr-i kelâm edip müteveffâ-yı mezbûr Karagöz Mehmed Paşa’nın mülkü olup Vilâyet-i Rumeli’nde Burgos kazâsında vâki‘ müteveffâ-yı mezbûra intimâ ile tahdîd ve tavsîfden müstağnî muhavvata-i dâhiliyyesi fevkānî büyût-ı adîdeli ve üç anbarı ve muhavvata-i hâriciyyesi kezâlik fevkānî ve tahtânî müte‘addide büyûtu ve bir samanlığı ve iki ahırı müştemil çiftlik ta‘bîr olunur mülk menzili ve menzil-i mezbûr dâhilinde mevcûd dokuz nefer gulâm ve câriyeleri ve ma‘lûmü’l-aded devâb ve mevâşî ve sâir hayvanât ve zirâat olunmuş hubûbât ve der-anbar olan mahsûlât ve bir kıt‘a ma‘lûmü’l-hudûd mülk çayırı ve sair âlât-ı zirâat ve esbâb-ı harâseti ba‘de vefâtihî irsen sagīrân-ı mezbûrân ile merkūmân Ramazan Çelebi ve Fâtıma Hânım’a intikāl edip lâkin müteveffâ-yı mezbûrun menkūlâtı şey-i kalîl olup muhallefâtından edâsına hükm-i şer‘î lâhık olan düyûn-ı müsbetesine vefâ etmemekle zarûret-i deyni için bey‘ olunup semeninden düyûnu edâ olunmak lâzım gelmeğin çiftlik-i mezbûr ba‘de’l-müzâyede ve inkıtâ‘u rağabâti’n-nâs merkūm Hüseyin Ağa üzerinde yüz bin fıddî râyic fi’l-vakt akçede karâr edip ziyâde ile tâlib-i âhar zuhûr etmemekle zikrolunan çiftliği ve çayırı bi-cümleti’t-tevâbi‘ ve’l-levâhık meblağ-ı mezbûr yüz bin akçeye mezbûrân Fâtıma ve Ramazan asâleten ve sagīrân-ı mezbûrânın vasîleri müvekkil-i müşârun-ileyh hazretleri vesâyeten mezbûr Hüseyin Ağa’ya bey‘ ve semeni ile merhûm-ı mezbûrun bazı düyûnu edâ ve îfâ eyledikden sonra zikrolunan çiftlik ve çayır semen-i mislinden noksân-ı fâhiş ile bey‘ olunup ve müteveffâ-yı mezbûrun tereke ve menkūlâtı düyûnuna vefâ ederken bey‘ olunmuşdur deyu bundan akdem sagīr-i mezbûr Mustafa Bey’in vasîsi olmağla vesâyeten ve paşa-yı mûmâ-ileyh dahi kezâlik sagīre-i merkūme Âişe Hânım’ın vasîsi olmağla vesâyeten mezbûr Hüseyin Ağa’dan da‘vâ ve taleb eylediğimizde beynimizde münâza‘ât-ı kesîre vâkı‘a olmuşidi el-hâletü hâzihî beynimize muslihûn tavassut edip beni ve paşa-yı mûmâ-ileyhi vesâyeten mezbûr Hüseyin Ağa ile otuz bin fıddî râyic fi’l-vakt akçe üzerine sulh eylediklerinde sulh olmak her vechile sagīrân-ı mezbûrân haklarında evlâ ve enfa‘ olmağın biz dahi herbirimiz sulh-ı mezbûru kabûl ve bedel-i sulh olan meblağ-ı mezbûr otuz bin akçeyi tamâmen mezbûr Hüseyin Ağa yedinden ahz u kabz eyledik ba‘de’l-yevm mezbûr Hüseyin Ağa ile zikri mürûr eden çiftlik ve çayıra müte‘allika bi-vechin mine’l-vücûh da‘vâ ve nizâ‘ımız kalmadı eğer ba‘de’l-yevm husûs-ı mezbûra müte‘allika da‘vâ bizden mersûm Hüseyin Ağa üzerine sudûr ve zuhûr ederse lede’l-hükkâm mesmû‘a olmaya dediklerinde vekîl-i mezbûr Mustafa ile vasiyy-i mezbûr Mustafa Efendi’nin vech-i muharrer üzere sudûr eden kelimâtı mezbûr Hüseyin Ağa vicâhen tasdîk ve şifâhen tahkīk etmeğin meblağ-ı mezbûr yüz otuz bin akçe zikri mürûr eden çiftlik ve çayırın yevm-i bey‘de semen-i misli olduğu zeyl-i kitâbda muharrerü’l-esâmi olan Müslimînden mefhari’l-akrân Halil Ağa b. Mehmed ve Ahmed Ağa b. İbrahim ve Mustafa Ağa b. Ali nâm kimesneler ihbârları ile lede’ş-şer‘i’l-mutahhar zâhir ve mütehakkık olmağın mâ-vaka‘a bi’t-taleb ketb olundu. Fi’l-yevmi’l-âşir min şehri Ramazâni’l-mübârek li-sene seb‘a ve sittîn ve elf. Şühûdü’l-hâl: Umdetü’l-emâcid ve’l-a‘yân Mustafa Ağa kethüdâ-yı paşa-yı mûmâ-ileyh, Ahmed Ağa b. İbrahim, Halil Ağa b. Mehmed, Mustafa Ağa b. Abdullah, Arnavud Hüseyin Ağa el-cündi, Silahdâr Hasan Ağa b. Abdullah, Ramazan Çelebi b. Abdullah.