Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 124 Hüküm no: 51 Orijinal metin no: [9a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merican v. David’in Eğin kazasındaki bağını Agop v. Yani’ye sattığı Vilâyet-i Anadolu’da Eğin kazâsına tâbi‘ Gamurgab nâm karye sükkânından horasancı tâifesinden Merican v. David nâm zimmî meclis-i şer‘-i hatîr-i lâzimü’t-tevkīrde ekmekçi tâifesinden Agop v. Yani nâm zimmî muvâcehesinde tav‘an ikrâr ve i‘tirâf edip zikri [âtî] akdin sudûruna değin silk-i mülk-i sahîhimde münselik olup karye-i mezbûre bağları dâhilinde vâki‘ bir tarafı Hobyar v. Hazar nâm Ermeni bağına ve bir tarafdan Serkiz v. Kurd nâm Ermeni bağına ve bir tarafdan Simaven v. Serkiz bağına ve bir tarafdan Hokas (…) [9b] altmış sekiz kıt‘a riyâlî guruşa tarafeynden îcâb ve kabûlü hâvî bey‘-i bâtt-ı sahîh ile bey‘ edip merkūm Agop dahi iştirâ ve kabûl ettikden sonra semen-i merkūm altmış sekiz kıt‘a riyâlî guruşu tamâmen bana def‘ ü teslîm edip ben dahi ahz u kabz ettiğimden sonra merkūm Agop’u bağ-ı mezkûru mahallinde zabt ve teslîme tarafımdan taslît eyledim min-ba‘d cemî‘ bağ-ı mezbûr mezkûr Agop’un mülk-i müşterâsıdır keyfe mâ yeşâ ve yahtâr mutasarrıf olsun dedikde mukırr-ı mezbûru minvâl-i muharrer üzere cârî ve sâdır olan ikrârında el-mukarru lehü’l-mezbûr Agop dahi bi’l-müvâcehe tahkīk ve bi’l-müşâfehe tasdîk edicek mâ-hüve’l-vâki‘ bi’t-taleb ketb olundu. Fi’l-yevmi’l-hâmis aşer min şehri Ramazâni’l-mübârek li-sene seb‘a ve sittîn ve elf. Şühûdü’l-hâl: Agop v. Yagob, Ferhad v. Emirgan, Avidik v. Agop, Mıgırdiç v. Haçador, Serkiz v. Arzumar, Yorgi v. Yani.