Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 128 Hüküm no: 56 Orijinal metin no: [10a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed ve İvaz b. Abdullah’ın cariye bedelinden merhum Ahmed Ağa zimmetinde kalan alacaklarının terekesinden ödenmesi Fazîletlü efendi hazretlerinin imzâsıyladır. İşbu râfi‘ü’l-kitâb Mehmed ve İvaz b. Abdullah nâm mühtedî dîvân-ı ma‘delet-unvânda ma‘kūd mahfil-i kazâda kapı ağası iken maktûlen vefât eden Ahmed Ağa’nın vâlidesi ve bi’l-inhisâr vârisesi olmağla terekesine vâzı‘atü’l-yed olan Kerîme Hâtun bt. Abdullah tarafından husûmet ve redd-i cevâba vekîl olup mezbûreyi ma‘rifet-i şer‘iyye ile ârifân olan İbrahim Efendi b. Mehmed ve Ömer b. Ebûbekir nâm kimesneler şehâdetleriyle şer‘an vekâleti sâbite olan Hüseyin Efendi b. eş-Şeyh Halil mahzarında üzerine takrîr-i da‘vâ edip müteveffâ-yı mezbûr Ahmed Ağa’ya hayâtında cins ve evsâfı beynimizde ma‘lûme Katibe ve Belkıs nâm iki câriye-i memlûkemi bi-safkatin vâhidetin yirmi bin fıddî râyic fi’l-vakt akçeye bâtten bey‘ ve teslîm ol dahi iştirâ ve tesellüm eyledikden sonra meblağ-ı mezbûru bana edâ etmedin zimmetinde iken vefât etmeğin tereke-i vâfiyyesinden bana alıverilmesin taleb ederin dedikde gıbbe’s-suâl vekîl-i mezbûr kaziyye bâlâda tafsîli mürûr ettiği vech üzere idiğini tav‘an mu‘terif olmağın meblağ-ı mezbûr yirmi bin akçe tereke-i müteveffâ-yı mezbûrdan müdde‘î-i mezbûr Mehmed ve İvaz’a edâ ve teslîme vekîl-i mezbûr Hüseyin Efendi’ye tenbîh olunup mâ-vaka‘a bi’t-taleb ketb olundu. Fi’l-yevmi’s-sâlis aşer min şehri Ramazâni’l-mübârek li-sene seb‘a ve sittîn ve elf. Şühûdü’l-hâl: (…) Ali Beşe (…)