Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 129 Hüküm no: 57 Orijinal metin no: [10b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Çelebi’nin mehir ve eşya hususunda boşandığı karısı Fatma bt. Mehmed ile sulh olduğu Mahmiye-i İstanbul’da Davudpaşa mahallesinde sâkin Ahmed Çelebi b. ( ) meclis-i şer‘-i hatîrde mahmiye-i mezbûrede Defterdâr Ahmed Efendi mahallesinde sâkine Fâtıma bt. Mehmed nâm bikr-i bâliğa tarafından husûs-ı âtîye vekîl olup nehc-i şer‘î [ve] vech-i mer‘î üzere vekâleti sâbite olan umdetü’l-a‘yân Ali Ağa b. Mustafa mahzarında ikrâr ve i‘tirâf edip mukaddemâ mezbûre Fâtıma’yı tezevvüc eylediğimde mehr-i müeccel nâmına yüz riyâlî guruş ve bir arakıyye ve bir çift mest ve papuç ve bir paşa dülbendi ve bir na‘lin ve bir serâser ve iki top kutnî ve bir yüzük ve bir âyîne ve iki donluk atlas ve bir donluk âl dârâyi irsâl edip ba‘de dâhil olmadın talâk-ı bâyin ile mezbûreyi tatlîk eylediğimde meblağ-ı mezbûr ile eşyâ-i merkūmeyi bi-aynihâ taleb ve da‘vâ eylediğimde beynimizde münâza‘ât-ı kesîre ve muhâsamât-ı şedîde vukū‘undan sonra vesâtat-ı muslihîn ile da‘vâ-yı mezbûreden vekîl-i mezbûr Ali Ağa benimle bin beş yüz fıddî râyic fi’l-vakt akçe üzerine inşâ-i akd-i sulh eylediğinde ben dahi sulh-ı mezbûru kabûl ve bedel-i sulh olan meblağ-ı mezbûr bin beş yüz akçeyi meclis-i şer‘de müvekkil-i mezbûr mâlı olmak üzere vekîl-i mezbûr yedinden tamâmen ahz u kabz edip ba‘de’l-yevm husûs-ı mezbûra müte‘allika cemî‘ de‘âvî ve mutâlebât ve eymândan ve muhâsamâtdan mezbûreyi ibrâ eyledim min ba‘d mezbûre kıbelinden vechen mine’l-vücûh ve sebeben mine’l-esbâb hak ve alâkam kalmadı dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’r-râbi‘ aşer min şehri Ramazâni’l-mübârek li-sene seb‘a ve sittîn ve elf. Şühûdü’l-hâl: Mustafa Efendi b. Şa‘ban, Mehmed Çelebi b. İbrahim, Ali Bey b. Abdullah, Rıdvan Ağa b. Abdullah, Mehmed Çavuş el-mübâşir, Mehmed Ağa b. İbrahim ve gayruhüm mine’l-[hâzırîn.]