Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 130 Hüküm no: 58 Orijinal metin no: [10b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kasım Ağazâde Ali Ağa’nın merhum Hasan Paşa’da olan sekiz yüz guruş alacağının oğlu Mustafa Bey’den tahsîli Sâbıkā yeniçeri efendisi olan iftihârü’l-emâcid ve’l-ekârim câmi‘u’l-mehâmid ve’l-mekârim zû’l-kadri’r-refî‘ ve’l-câhi’l-menî‘ Kasım Ağazâde demekle şehîr Ali Ağa tarafından husûs-ı âti’z-zikre vekîl olup vekâleti Osman Beşe b. Receb ve Halil Beşe b. Abdullah nâm kimesneler şehâdetleriyle hasm-ı şer‘î-i câhid-i âtî muvâcehesinde sâbite olan Salih Çelebi b. Ebûbekir mahfil-i kazâda sâbıkā başdefterdâr olup mahmiye-i İstanbul’da Emin Bey mahallesi sükkânından iken bundan akdem vefât eden Hasan Paşa’nın sulbî kebîr oğlu Mustafa Bey tarafından husûmet ve redd-i cevâba vekîl olup bi-mâ-hüve nehcü’s-sübût şer‘an vekâleti sâbite olan Muhyi Bey b. ( ) mahzarında bi’l-vekâle üzerine da‘vâ edip târih-i kitâbdan yedi sene mukaddem müvekkilim mûmâ-ileyh Ali Ağa ile mezbûr Hasan Paşa beynlerinde cereyân eden bey‘ ve şirâ ve karz ve ahz u i‘tâ ve sâir mu‘âmelât-ı şettâ-yı sâire eylediklerinde müvekkilimin mezbûr Hasan Paşa zimmetinde sekiz yüz kıt‘a riyâlî kebîr guruş hakkı zuhûr edip hattâ meblağ-ı mezbûr vech-i muharrer üzere müvekkilime deyni olduğunu mezbûr Hasan Paşa re’sü’l-işhâd ikrâr, müvekkilim tasdîk ettikden [sonra] kable’l-edâ zimmetinde iken vefât etmişdir suâl olunup ihkāk-ı hak olunmak matlûbumdur dedikde gıbbe’s-suâl ve akībe’l-inkâr vekîl-i mezbûrdan müdde‘âsını mübeyyine beyyine taleb olundukda şühûdûndan biri sâhib-i firâş olmağla menziline varıp onda istimâ‘ olunmasını iltimâs etdikde şühûdu istimâ‘a me’zûnen irsâl olunan Mevlânâ Şeyhzâde Mustafa b. eş-Şeyh Mehmed mahmiye-i mezbûrede Süleymaniye kurbünde Sarı Bayezid mahallesinde fahrü’l-cüyûş Ali Çavuş b. Ahmed Efendi’nin menziline varıp zeyl-i sahîfede isimleri mastûr olan Müslimîn huzûrlarında akd-i meclis-i şer‘-i şerîf eyledikde udûl-i Müslimînden olup sâhib-i firâş olan mezkûr Ali Çavuş ve mahalle-i mezbûrede sâkin zümre-i müderrisînden Abdullah Çelebi b. Mehmed nâm kimesneler li-ecli’ş-şehâde meclis-i ma‘kūd-ı mezbûrda hâzırân olup isre’l-istişhâd fi’l-vâki‘ mezbûr Hasan Paşa yedi sene mukaddem müvekkil-i mezbûr Ali Ağa ile beynlerinde cereyân eden bey‘ ve şirâ ve karz ve i‘tâ ve sâir mu‘âmelât-ı şettâyı bizim huzûrumuzda muhâsebe eylediklerinde zimmetinde müvekkil-i mezbûr Ali Ağa’ya sekiz yüz riyâlî guruş deyni zuhûr etmekle meblağ-ı mezbûr sekiz yüz riyâlî guruş müvekkil-i mezbûr zimmetimde lâzimü’l-edâ ve vâcibü’l-kazâ deynim vardır deyu bi’d-defe‘ât ikrâr ve müvekkil-i mezbûr dahi tasdîk eyledi ol vechile mezbûr Hasan Paşa’nın meblağ-ı mezbûr sekiz yüz riyâlî guruş müvekkil-i mezbûra deyni olduğuna şâhidleriz şehâdet dahi ederiz deyu herbiri vekîl-i mezbûr Muhyi Bey muvâcehesinde edâ-i şehâdet-i şer‘iyye eylediklerinde mevlânâ-yı mezbûr şâhidân-ı mezkûrânı zeyl-i rakīmde isimleri mastûr olan Müslimîn ile ta‘dîl ve tezkiye eyledikden sonra ba‘de’t-tahrîr ma‘an ba‘s olunan Çukadâr Kadri Çelebi ve Ahmed Çelebi ile meclis-i şer‘a gelip mütehâsımeyn muvâcehelerinde haber verdiklerinden sonra şâhidân-ı mezbûrânın şehâdetleri makbûle ve müvekkil-i mezbûr Ali Ağa meclis-i şer‘a hâzır olup ale’n-nehci’l-ma‘hûd tahlîf olundukdan sonra mûcebince ba‘de’l-hükm mâ-vaka‘a bi’t-taleb ketb olundu. Fi’l-yevmi’r-râbi‘ aşer min şehri Ramazâni’l-mübârek li-sene seb‘a ve sittîn ve elf. Şühûdü’l-hâl: Mehmed Çavuş b. İbrahim, Ahmed Çelebi b. Hüseyin Efendi, Kadri Çelebi, Mustafa Efendi b. Mehmed, Mehmed Ağa b. Abdullah, Hasan Ağa, Mahmud Ağa.