Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 131 Hüküm no: 59 Orijinal metin no: [10b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Safiye bt. Abdullah’ın mehir hususunda boşandığı kocası Mustafa b. Nasuh’un zimmetini ibra ettiği Mahmiye-i İstanbul’da Âşık Paşa kurbünde Hâcı Ferhad mahallesinde sâkine Safiye bt. Abdullah nâm hâtun meclis-i şer‘-i hatîr-i lâzimü’t-tevkīrde zevc-i mutallıkı işbu râfi‘ü’l-kitâb Mustafa b. Nasûh mahzarında bi-tav‘ihâ ikrâr ve i‘tirâf edip zevcim mezkûr Mustafa beni talâk-ı selâse ile tatlîk eylediğinden nikâhım ma‘kūd [olup], zimmetinde mütekarrir olan üç yüz fıddî râyic fi’l-vakt mehr-i müeccelimin iki yüz akçesini nakid ve yüz akçesi mukābilesinde bir köhne beledî döşek ve bir yemeni yorgan ve bir beledî yasdık ve bir köhne sepet sandığı yedinden ahz u kabz edip mehr-i müeccelime müte‘allika zevcim mezbûr Mustafa zimmetinde bir akçe ve bir habbe hakkım bâkī kalmadı dedikde mezkûre Safiye Hâtun’u vech-i meşrûh üzere cârî ve sâdır olan ikrârında el-mukarru lehü’l-mezkûr Mustafa vicâhen tasdîk ve şifâhen tahkīk edicek mâ-hüve’l-vâki‘ bi’t-taleb ketb olundu. Tahrîren fi’l-yevmi’s-sâdis aşer min şehri Ramazâni’l-mübârek li-sene seb‘a ve sittîn ve elf. Şühûdü’l-hâl: Abdi Çelebi b. Maksud, Abdurrahman b. Nasûh, İsmail Çelebi b. Mehmed el-müezzin, Hamza Beşe b. Mehmed, Mehmed b. el-Hâc Süleyman, Hasan b. Abdullah, Süleyman Beşe b. Abdullah, Yusuf Beşe b. Abdullah, Ahmed b. ( ) hayyât ve gayruhüm mine’l-[hâzırîn.]