Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 131 Hüküm no: 60 Orijinal metin no: [10b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emrullah Bey b. Nuh’un Ayşe bt. Mehmed’de üç bin yedi yüz otuz akçe alacağı olduğu Mahmiye-i İstanbul’da Altıpoğaça mahallesinde sâkin Dergâh-ı âlî solaklarından Emrullah Bey b. Nuh meclis-i şer‘-i hatîr-i lâzimü’t-tevkīrde mahmiye-i mezkûrede Ördek Kasab mahallesinde sâkine Âişe bt. Mehmed nâm hâtun mahzarında üzerine takrîr-i da‘vâ edip işbu Âişe Hâtun zimmetinde yedimden müşterâ ve makbûz beynimizde ma‘lûm keten bezi ve gömlek ve boğça semenlerinden dört bin fıddî râyic fi’l-vakt akçe hakkım olup meblağ-ı mezkûrun iki yüz yetmiş akçe olmak üzere üç guruşunu mezkûre Âişe Hâtun yedinden ahz u kabz edip mâ‘adâsı olan üç bin yedi yüz otuz akçe hakkımı taleb eylediğimde vermede ta‘annüt eder suâl olunup alıver[ilmesi] matlûbumdur dedikde gıbbe’s-suâl mezbûre Âişe Hâtun cevâbında fi’l-hakīka müdde‘î-i mezbûr Solak Emrullah Bey’e (…) [11a] iki yüz yetmiş akçe olmak üzere üç guruşu kendiye edâ ve teslîm edip mâ‘adâsı olan üç bin yedi yüz otuz akçesi hâlâ zimmetimde lâzimü’l-edâ ve vâcibü’l-kazâ deynimdir deyu bi-tav‘ihâ ikrâr ve i‘tirâf edicek ikrârı mûcebince meblağ-ı mezbûr üç bin yedi yüz otuz akçeyi müdde‘î-i mezbûra edâ ve teslîme mezbûre Âişe üzerine ilzâm-ı şer‘î olunup mâ-hüve’l-vâki‘ bi’t-taleb ketb olundu. Tahrîren fi’l-yevmi’s-sâdis aşer min şehri Ramazâni’l-mübârek li-sene seb‘a ve sittîn ve elf. Şühûdü’l-hâl: Hacı Ahmed b. ( ) tüccârdan, Hızır Çelebi, Ali Bey b. ( ) kapıcı, Mehmed Çelebi b. Ali ve gayruhüm mine’l-[hâzırîn.]