Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 135 Hüküm no: 65 Orijinal metin no: [11b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şemsi ve Ayşe’nin kardeşleri merhum İbrahim Ağa b. Ali’nin Tabbah Osman b. Mustafa’da alacağı olduğuna dair iddialarının asılsız olduğu Hâssa tabbâhlardan işbu râfi‘ü’l-kitâb Osman b. Mustafa mahfil-i kazâda atebe-i aliyyede cebecibaşı iken bundan akdem vefât eden İbrahim Ağa b. Ali’nin verâseti li-ebeveyn kız karındaşları Şemsi ve Âişe nâm hâtunlara ve cedde-i sahîhası Emine nâm hâtuna ve li-ebeveyn ammi oğulları ve usûbet-i nesebiyye cihetinden vârisleri olan Himmet ve Minnet nâm kimesnelere münhasıra olduğu şer‘an mütehakkık oldukdan sonra mezbûretân Şemsi ve Âişe taraflarından husûs-ı âtîye vekîl olup nehc-i şer‘î ve vech-i mer‘î üzere vekâleti sâbite olan Sinan Bey nâm bevvâb-ı sultânî mahzarında üzerine takrîr-i da‘vâ edip gāib ani’l-meclis Tekeli Mustafa Paşa hazretleri hâlâ Saray-ı cedîd-i sultânî ağası olup derûn-ı sarayda eczâ-i şerîfe tilâveti için mevkūfe nukūda mütevellî olan umdetü’l-havâs ve’l-mukarrebîn sâhibü’l-izzi ve’t-temkîn Mehmed Ağa tarafından ikrâz ve teslîme vekîl olunan mezbûr İbrahim Ağa’dan hayâtında mâl-ı vakfdan olmak üzere dokuz yüz on riyâlî guruş karz olup dört yüz on guruşu teslîm edip mâ‘adâ olan beş yüz riyâlî guruşu mütesellimi Hamid Ağa’dan havâle-i sahîha-i şer‘iyye ile havâle eyledikden sonra meblağ-ı muhâlün-bih-i mezbûr beş yüz riyâlî guruş ben emr ve kabûlü hâviye kefâletle kefîl ve mezbûr İbrahim Ağa dahi fevt olup ba‘dehû meblağ-ı mevkūf-ı mezbûru bi-hükmi’l-kefâle mütevellî-i mezbûr Saray Ağası Mehmed Ağa’ya tamâmen teslîm eylediğimde mezbûretân Şemsi ve Âişe meblağ-ı mezbûr mûrisimiz müteveffâ-yı mezkûr İbrahim Ağa’nın kendi mâlıdır bize isâbet eden hisseden ver deyu her bâr rencîdeden hâlî değillerdir vekîl-i mezbûra suâl olunup mu‘ârazadan men‘ u def‘ olunmak matlûbumdur dedikde gıbbe’s-suâl vekîl-i mezbûr Sinan Bey kaziyye bâlâda tafsîli mürûr ettiği vech üzere idiğini mu‘terif olmağın bî-vech mu‘ârazadan men‘ birle mâ-vaka‘a bi’t-taleb ketb olundu. Fi’l-yevmi’t-tâsi‘ min şehri Ramazâni’l-mübârek li-sene seb‘a ve sittîn ve elf. Şühûdü’l-hâl: İvaz Ağa ser-muhzırân, Hacı Receb, Ya‘kub Ağa, İbrahim Ağa, Ali Beşe çukadâr, İsa Bey ve gayruhüm mine’l-[hâzırîn.]