Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 136 Hüküm no: 66 Orijinal metin no: [11b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine bt. Hüseyin’in merhume Olınşah bt. Mustafa’nın terekesi hususunda kızı Sâliha aleyhine açtığı davanın reddi Mahmiye-i İstanbul’da Yavuzer mahallesinde sâkine iken bundan akdem vefât eden Olanşah bt. Mustafa nâm hâtunun rebîbesi Emine bt. Hüseyin nâm hâtun meclis-i şer‘-i hatîr-i lâzimü’t-tevkīrde müteveffât-ı merkūmenin terekesine vâzı‘atü’l-yed olan sadriye kebîre kızı bâ‘isetü’l-vesîka Sâliha bt. Mustafa mahzarında üzerine da‘vâ ve takrîr-i kelâm edip kendi mülk ve cihâzım olan eşyâmdan iki yan keçesi ve iki alaca kilim ve iki ayaklı sahan ve iki tas ve bir demir keten tarağı ve yedi çârşeb ve on aded gömlek ve don ve iki döşek yüzü ve bir kebîr tencere ve bir tâbe târih-i kitâbdan üç sene mukaddem hayâtında müteveffât-ı merkūmeye îdâ‘ ve teslîm ol dahi yedinden istîdâ‘ ve tesellüm edip kable’l-ahz vefât eyledikde eşyâ-i mezbûreye merkūme Sâliha tereke-i müteveffât-ı merkūmeden olmak üzere vaz‘-ı yed edip taleb eylediğimde bana teslîmden imtinâ‘ eder suâl olunsun dedikde gıbbe’s-suâl merkūme Sâliha cevâbında tereke-i müteveffât-ı merkūmeden olmak üzere vaz‘-ı yedini ikrâr lâkin müdde‘iye-i mezbûre vech-i muharrer üzere eşyâ-i merkūmeyi hayâtında müteveffât-ı mezbûreye îdâ‘ ve teslîm eylediğini inkâr edicek müdde‘iye-i mersûmeden müdde‘âsını mübeyyine beyyine taleb olundukda ityân-ı beyyineden izhâr-ı acz edip istihlâf eylemeğin fi’l-hakīka müdde‘iye-i mezbûre Emine kendi mülk ve cihâzı olup zikri mürûr eden eşyâsını hayâtında târih-i mezbûrda vâlidesi müteveffât-ı merkūme yedine îdâ‘ ve teslîm ettiğini bilmediğine ve ol vechile eşyâ-i mezbûrenin müdde‘iye-i merkūmeye red ve teslîmi vâcib değil idiğine mezbûre Sâliha’ya yemîn teklîf olundukda ol dahi yemîn billâhi’l-aliyyi’l-a‘lâ etmeğin mûcibiyle bî-vech ta‘arruzdan men‘ birle mâ-hüve’l-vâki‘ bi’t-taleb ketb olundu. Fi’l-yevmi’r-râbi‘ aşer min şehri Ramazâni’l-mübârek li-sene seb‘a ve sittîn ve elf. Şühûdü’l-hâl: Osman Beşe çukadâr, İsmail b. Yunus, İsa Bey b. Ahmed ve gayruhüm mine’l-[hâzırîn.]