Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 137 Hüküm no: 67 Orijinal metin no: [11b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Bey b. Yayla’nın Tokat kazasına bağlı Almus köyündeki üç adet tarlalarının kullanım hakkını altmış guruşa Behram Ağa b. Mahmud’a devrettiği Mahmiye-i İstanbul’da Âşık Paşa mahallesi ahâlîsinden zahrü’l-akrân Behram Ağa b. Mahmud’dan istişhâd-ı şer‘î sudûrundan sonra Vilâyet-i Anadolu’da Tokat kazâsına tâbi‘ İlmus (Almus) nâm karye ahâlîsinden Ali Bey b. Abdullah ve Abdullah b. Nasûh nâm kimesneler meclis-i şer‘a hâzırân olup fi’l-asl karye-i mezbûre ahâlîsinden olup hâlâ mahmiye-i İstanbul’da Yenibahçe kurbünde Ördek Kasab mahallesinde sâkin gāib ani’l-meclis Mustafa Bey b. Yayla nâm kimesne târih-i kitâbdan üç sene mukaddem karye-i mezkûrede Değirmenönü nâm mevzi‘de vâki‘ bir tarafdan Abdi Beşe tarlasına ve bir tarafdan Yahya nâm kimesne tarlasına ve bir tarafdan Hamza Bey değirmenine ve bir tarafdan tarîk-ı âmma müntehî bir kıt‘a tarla ve yine karye-i mezkûrede Kâfir Makberesi nâm mevzi‘de vâki‘ bir tarafdan Abdünnebi tarlasına ve iki tarafdan Yusuf Beşe tarlasına ve bir tarafdan tarîk-ı âmma müntehî bir kıt‘a tarla [ve yine karye-i mezkûrede] Alemdâr nâm mevzi‘de vâki‘ bir tarafdan Nasûh Ağa tarlasına ve bir tarafdan Abdünnebi Bey tarlasına ve bir tarafdan Ebûbekir tarlasına ve bir tarafdan meşeliğe [12a] müntehî olup tahmînen on keyl tohum isti‘âb eder üç kıt‘a tarlalarını müsteşhid-i mezbûr Behram Ağa’ya bizim huzûrumuzda altmış riyâlî guruş bedel mukābilesinde sâhib-i arz ma‘rifeti ile ferâğ ve tefvîz edip ol dahi minvâl-i meşrûh üzere tefevvüz ve kabûl eyledikden sonra bedel-i ferâğ olan meblağ-ı mezkûr altmış guruşu merkūm Behram Ağa yedinden tamâmen ahz u kabz eyledi biz bu husûsa bu vech üzere şâhidleriz şehâdet dahi ederiz deyu herbiri [edâ-i] şehâdet-i şer‘iyye eylediklerinden sonra gāib-i mezkûr Ali Bey’in meclis-i şer‘a huzûru müte‘azzir olduğundan mâ‘adâ şâhidân-ı mezkûrânın müsâferete teveccüh ve azîmetleri müte‘ayyin olmağın şâhid-i mezbûr Ali Bey vech-i muharrer üzere şehâdetini işbu hâzırân bi’l-meclis olan Mehmed b. Mehmed ve Ali Efendi b. Mehmed nâm kimesnelere ve şâhid-i mezbûr Abdünnebi kezâlik vech-i muharrer üzere şehâdetini hâzırân bi’l-meclis Mustafa Efendi b. Halil ve Şa‘ban Efendi b. Hasan nâm kimesnelere meclis-i şer‘de tahmil eylediklerinde onlar dahi herbiri şâhidân-ı mezkûran lisanlarından vech-i meşrûh üzere şehâdeti tahammül ve kabûl eylediklerinde mâ-hüve’l-vâki‘ bi’t-taleb ketb olundu. Fi’l-yevmi’s-sâbi‘ aşer min şehri Ramazâni’l-mübârek li-sene seb‘a ve sittîn ve elf. Şühûdü’l-hâl: Hüseyin Beşe b. Mustafa, Ebûbekir Bey b. ( ), Kasım Çelebi, Çukadâr Osman Beşe.