Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 138 Hüküm no: 69 Orijinal metin no: [12a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kolonya köyü sipahisi Yusuf Bey b. Mehmed’in kendi reayasından olduğu iddiasıyla kırk seneden beri İstanbul’da oturan Nikola v. Yani’den vergi alamayacağı Vilâyet-i Rumeli’nden Mizistre kazâsına tâbi‘ Kolonya nâm karyenin berât-ı âlîşân ile sipâhîsi olan Yusuf Bey b. Mehmed meclis-i şer‘-i hatîrde karye-i mezbûre re‘âyâsından işbu bâ‘isü’s-sifr Nikola v. Yani nâm zimmî muvâcehesinde üzerine da‘vâ ve takrîr-i kelâm edip mezbûr Nikola yedimde olan sûret-i defter-i cedîd-i sultânîde karye-i mezbûre re‘âyâsından olup âhar diyârda tavattun etmekle üzerine lâzım gelen ispençe ve çiftbozan resmini hâlâ mezbûr Nikola’dan taleb eylediğimde edâdan imtinâ‘ eder suâl olunsun dedikde gıbbe’s-suâl mezbûr Nikola cevâbında fi’l-vâki‘ mârrü’z-zikr karye re‘âyâsından Yani nâm zimmînin olup lâkin kırk sene mukaddemden bu ana gelince mahmiye-i İstanbul’da tavattun etmekle merhûm ve mağfûrun-leh Ebû’l-feth Sultân Mehmed Hân aleyhi’r-rahmetü ve’l-gufrân hazretlerinin defterlü vakf-ı şerîfi re‘âyâsına ilhâk olunup beher sene üzerime edâsı lâzım gelen cizye ve sâir rüsûmu cânib-i vakf-ı mezbûra edâ ve teslîm eylemekle karye-i mezbûreden kat‘-ı alâka eylemişdim hatta karye-i mezbûre sipâhîsi ol vechile benden ispençe ve çiftbozan akçesi almağa kādir olmadığını nâtıka hâlâ şeyhülislâm ve müftî’l-enâm hazretlerinden yedimde fetvâ-yı şerîfe dahi vardır deyu fetvâ-yı şerîfe ibrâz edip nazar olundukda mazmûnu; “Zeyd zimmî karyesinden kat‘-ı alâka edip varıp âhar karyede tavattun ve onda ra‘iyyet kayd olunup üzerine lâzım gelen cizye ve sâir tekâlifi edâ ederken karye-i ûlâ sipâhîsi gelip Zeyd’den ispençe ve çiftbozan akçesi nâmına bir nesne almağa kādir olur mu deyu istiftâ olundukda cevâb-ı bâ-savâblarında olmaz” deyu buyurulmağın ber-mûceb-i fetvâ-yı şerîfe müdde‘î-i mezbûr Yusuf Bey ta‘arruzdan men‘ olunup mâ-vaka‘a bi’t-taleb ketb olundu. Fi’l-yevmi’s-sâlis aşer min şehri Ramazâni’l-mübârek li-sene seb‘a ve sittîn ve elf. Şühûdü’l-hâl: Mehmed Çavuş b. Osman el-mübâşir, Mustafa Çavuş b. Veli, İbrahim Bey b. Ahmed el-cündi, Osman Beşe çukadâr ve gayruhüm mine’l-[hâzırîn.]