Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 139 Hüküm no: 70 Orijinal metin no: [12a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rahip Yasef v. Yorgi’nin alacak davasında Sipahi Mehmed Ağa ile otuz guruş üzerine sulh olduğu Vilâyet-i Anadolu’da medîne-i Sinob hâricinde kefere mahallesinde sâkin Yasef v. Yorgi nâm râhib tarafından husûmet ve redd-i cevâba ve lâzım geldikde sulh ve ibrâya vekîl olup vekâleti nakl-i şer‘î ile sâbite olan Sakoldi v. Laskari nâm zimmî meclis-i şer‘-i hatîr-i lâzimü’t-tevkīrde Dergâh-ı âlî dâme mahfûfen bi’l-me‘âlî kapıcıbaşılarından iftihârü’l-emâcid ve’l-ekârim câmi‘u’l-mehâmid ve’l-mekârim Sipâhî Mehmed Ağa b. ( ) tarafından sulh-ı âti’l-beyânı tasdîka vekîl olup bi-mâ-hüve nehcü’s-sübût şer‘an sâbite olan umdetü’l-emâsil ve’l-akrân bâ‘isü’l-kitâb Hasan Çavuş b. Abdullah mahzarında bi’l-vekâle tav‘an ikrâr ve i‘tirâf edip bundan akdem işbu vekîlin müvekkili müşârun-ileyh Sipâhî Mehmed Ağa müvekkilim mezkûr Yasef’in medîne-i mezkûreye sefîne binâsına geldikde bi-gayri vech-i şer‘î yüz kıt‘a riyâlî guruşunu ahz u kabz eylemişdir deyu taleb ve da‘vâ eylediğimde ol dahi inkâr edip benim dahi beyyinem olmamağla beynimizde münâza‘ât-ı kesîre ve muhâsamât-ı ekîde vâki‘ olmuşdu el-hâletü hâzihî beynimize muslihûn tavassut edip da‘vâ-yı mezkûremden beni müvekkil-i mezkûr Sipâhî Mehmed Ağa ile an-inkâr otuz kıt‘a riyâlî guruş üzerine sulh eylediklerinde ben dahi bi’l-vekâle sulh-ı mezkûru kabûl ve bedel-i sulh olan meblağ-ı mezkûr otuz kıt‘a riyâlî guruşu meclis-i sulhda müvekkil-i müşârun-ileyh yedinden tamâmen ahz u kabz eyledim min ba‘d husûs-ı mezkûra müte‘allik müvekkil-i müşârun-ileyhin üzerine müvekkilim mezkûrun bi-vechin mine’l-vücûh ve sebebin mine’l-esbâb da‘vâ ve husûmet ve hakkı kalmadı dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’l-hâmis aşer min şehri Ramazâni’l-mübârek li-sene seb‘a ve sittîn ve elf. Şühûdü’l-hâl: Mustafa Çavuş b Mehmed Maksud, Ali Bey b. Abdurrahman, Kadızâde Haseki Mustafa Ağa, Hüseyin Çelebi b. Salih ve gayruhüm mine’l-[hâzırîn.]