Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 140 Hüküm no: 72 Orijinal metin no: [12b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Safiye bt. Abdullah’a hamilelik süresi bitimine kadar boşandığı kocası Mustafa b. Nasuh tarafından günlük beşer akçe nafaka verilmesi Mahmiye-i İstanbul’da Âşık Paşa mahallesinde sâkine Safiye bt. Abdullah nâm hâtun meclis-i şer‘-i hatîr-i lâzimü’t-tevkīrde zevc-i mutallıkı işbu hâzır bi’l-meclis Mustafa b. Nasûh muvâcehesinde takrîr-i kelâm ve bast-i merâm edip zevcim mezbûr Mustafa beni talâk-ı selâse ile tatlîk eylediğinde kendiden hamlim müte‘ayyin olmağın iddet-i hamlim münkaziye oluncaya değin cânib-i şer‘den zevcim mezbûr Mustafa üzerine beher yevm nafaka takdîr olunmak matlûbumdur dedikde sadr-ı kitâbı tevkī‘-i müstetâbı ile muvakkı‘ olan hâkim-i hâsim esbağallahu ni‘amehû aleyh dahi mezbûre Safiye Hâtun’a iddet-i hamli münkaziye oluncaya değin zevci mezbûr Mustafa üzerine beher yevm beşer akçe nafaka farz ve takdîr edip vakt-i zarûretde istidâneye ve lede’z-zafer zevci mezbûr Mustafa üzerine rücû‘a izin vermeğin mâ-hüve’l-vâki‘ bi’t-taleb ketb olundu. Tahrîren fi’l-yevmi’l-hâmis aşer min şehri Ramazâni’l-mübârek li-sene seb‘a ve sittîn ve elf. Şühûdü’l-hâl: Abdi Çelebi b. Maksud, Abdurrahman b. Nasûh, İsmail Çelebi b. Mehmed el-müezzin, Hamza Beşe b. Mehmed ve gayruhüm mine’l-[hâzırîn.]