Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 144 Hüküm no: 78 Orijinal metin no: [13a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yani v. Yanaki’nin Rize’de babasından kalan arsa ve bahçeyi haksız yere zaptettiği iddiasıyla Kaya Çelebi b. Mehmed aleyhine açtığı davada iddiasını ispat edemediği Fi’l-asl Vilâyet-i Anadolu’da Trabzon sancağında Rize kazâsında Samro mahallesinden olup mahrûse-i Galata muzâfâtından İstinye nâhiyesine tâbi‘ Yeniköy nâm karyede bundan akdem hâlik olan Yanaki v. ( ) nâm zimmînin sulbî sagīr oğlu Yani’nin tesviye-i umûruna kıbel-i şer‘den mansûb vasîsi olan Mahmud Beşe b. Mustafa meclis-i şer‘-i hatîr-i lâzimü’t-tevkīrde mahalle-i mezbûre sükkânından işbu bâ‘isü’l-vesîka Kaya Çelebi b. Mehmed mahzarında üzerine bi’l-vesâye da‘vâ ve takrîr-i kelâm edip hâlik-i mezbûrun mülkü ve hakkı olup zikri mürûr eden Samro mahallesinde vâki‘ bir tarafı Mahmud nâm kimesne mülküne ve bir tarafı Kara Kurd menziline ve bir tarafı Ali Beşe nâm râcil mülküne ve bir tarafı mezbûr Kaya Çelebi mülküne müntehî arsa-i hâliye ve cüneyne ba‘de helâkihî irsen vasîsi olduğum sagīr-i mezbûra isâbet ve intikāl etmişiken hâlâ mezbûr Kaya Çelebi bi-gayrı hakkın vaz‘-ı yed edip tasarruf eder suâl olunup kasr-ı yedine tenbîh olunmak matlûbumdur dedikde gıbbe’t-tasdîk mezbûr Kaya Çelebi cevâbında zikri mürûr eden arsa-i hâliye ve cüneyeye vaz‘-ı yedini ikrâr edip lâkin arsa-i hâliye-i mezbûre ve cüneyne-i mersûme hâlik-i mezbûrun li-ebeveyn kız karındaşı olup bundan akdem hâlik olan Harselyan nâm Nasrâniye’nin olmağla hayâtında hâlike-i mezbûre Harselyan zikrolunan arsa-i hâliye ve cüneyneyi benim mülküm olup Rize kasabasında Meyhâneci nâm mevzi‘de vâki‘ lede’l-ahâlî ve’l-cîrân ma‘lûmü’l-hudûd mülk arsa-i hâliyem ile bi-tarîkı’l-mukābeze bana bey‘ ve teslîm ben dahi iştirâ ve tesellüm etmekle mülk-i müşterâm olmak üzere vaz‘-ı yed ve tasarruf ederim deyu zikrolunan arsa-i hâliye ve cüneyne vech-i muharrer üzere hâlik-i mezbûrun ile’l-helâk mülkü olup ba‘de helâkihî sagīr-i mezbûra intikāl ettiğini inkâr edicek vasiyy-i mezbûrdan müdde‘âsını mübeyyine beyyine taleb olundukda ityân-ı beyyineden izhâr-ı acz edip istihlâf etmeğin fi’l-vâki‘ hudûd-ı mezkûre ile mahdûde olan arsa-i hâliye ve cüneyne vech-i muharrer üzere hâlik Yanaki’nin ile’l-helâk mülkü olup ba‘de helâk[ihî] irsen oğlu sagīr-i merkūma isâbet ve intikāl ettiğini bilmediğine mezbûr Kaya Çelebi’ye yemîn teklîf olundukda ol dahi hasbe’l-mes’ûl yemîn billâhi te‘âlâ etmeğin mûcibiyle vasiyy-i mezbûr bî-vech mu‘ârazadan men‘ olunup mâ-vaka‘a bi’t-taleb ketb olundu. Fi’l-yevmi’s-sâmin aşer min şehri Ramazâni’l-mübârek li-sene seb‘a ve sittîn ve elf. Şühûdü’l-hâl: Ali Beşe b. Osman, Mahmud b. Osman, İsmail b. Yunus, Osman Beşe çukadâr, Kaya Beşe b. Mehmed, Mustafa Çelebi b. Mehmed, Çavuşzâde Mehmed Çelebi b. Ali ve gayruhüm mine’l-[hâzırîn.]