Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 145 Hüküm no: 79 Orijinal metin no: [13a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Niko v. Savel’in miras hususunda Toya v. Niko’dan iki bin altı yüz akçe alacağı olduğu Vilâyet-i Rumeli’nden Premedi kazâsına tâbi‘ Bogoyna nâm karye sâkinlerinden işbu bâ‘isü’s-sifr Niko v. Savel nâm zimmî meclis-i şer‘-i hatîr-i lâzimü’t-tevkīrde li-ebevyen ammi olan Toya v. Niko nâm zimmî muvâcehesinde üzerine da‘vâ ve takrîr-i kelâm edip karye-i mezbûrede vâki‘ bir tarafdan Yani v. Kiro mülkü ve bir tarafdan Duka v. Milo mülkü ve bir tarafdan Kirko v. Koçı mülkü ve bir tarafdan tarîk-ı âm ile mahdûd mülk menzil ve yirmi aded koyun ve iki karasığır ineği ve iki karasığır öküzü ve beynimizde ma‘lûm on iki aded evânî-i nuhâsiyye ve bir kıyye gümüş ve sâir beynimizde ma‘lûm esâs-ı beyt mukaddemâ mürd olan ceddim Niko’nun mülkü olup ba‘de helâkihî babam Savel ile ammim mezbûr Toya’ya intikāl edip ale’l-iştirâk mutasarrıflar iken babam mezbûr Savel dahi hâlik oldukda nısf hisse-i şâyi‘ası bana isâbet ve intikāl etmişiken cümlesini ammim mezbûr Toya zabt edip zabtında iken menzil muhterik olup ba‘de’l-ihtirâk menzilden ve sâir mezkûre olan muhallefâtından hissemi taleb ve da‘vâ eylediğimde beynimizde münâza‘ât-ı kesîre vâkı‘a oldukdan sonra beynimize muslihûn tavassut edip târih-i kitâbdan sekiz ay mukaddem muhallefât-ı hâlik-i mezbûrdan beni mezbûr Toya ile iki bin altı yüz akçe üzerine sulh eylediklerinde ben dahi sulh-ı mezbûru kabûl edip bedel-i sulh olan iki bin altı yüz akçe hakkım mezbûr Toya’nın zimmetinde kalmağla hâlâ taleb ederin suâl olunsun dedikde gıbbe’s-suâl ve’l-inkâr müdde‘î-i mezbûr Niko’dan müdde‘âsını mübeyyine beyyine taleb olundukda karye-i mezbûre sükkânından Niko v. Miho ve Benye v. Kulu ve Miho v. Simo nâm zimmîler li-ecli’ş-şehâde meclis-i şer‘a hâzırûn olup isre’l-istişhâd fi’l-hakīka müdde‘î-i mezbûr Niko’nun ceddi hâlik-i mezbûr Niko’nun muhallefâtından karye-i mezbûrede vâki‘ menzil-i mahdûd-ı mezbûr ve yirmi aded koyun ve iki karasığır ineği ve iki karasığır öküzü ve on iki aded evânî-i nuhâsiyye ve bir vakıyye gümüş ve sâir esâs-ı beytin nısfı müdde‘î-i mezbûr Niko’nun babası mezbûr Savel’e ve nısfı ammi Toya’ya isâbet etmekle ale’l-iştirâk mutasarrıflar iken mezbûr Savel dahi hâlik olup nısf hissesi oğlu mezbûr Niko’ya intikāl eylemişken muhallefât-ı mezkûrenin cümlesini mezbûr Toya zabt edip menzil dahi muhterik oldukdan sonra mezbûr Niko arsa-i menzilden ve sâir mezkûr olan muhallefâtdan hissesini taleb ve da‘vâ eylediğinde beynlerine muslihûn tavassut edip târih-i mezbûrda merkūm Toya ile iki bin altı yüz akçe üzerine sulh eylediklerinde ol dahi sulh-ı mezbûru kabûl edip bedel-i sulh olan meblağ-ı mezkûr iki bin altı yüz akçe mezbûr Toya zimmetinde kalmışdır biz bu husûsa bu vech üzere şâhidleriz şehâdet dahi ederiz deyu herbiri edâ-i şehâdet-i şer‘iyye eylediklerinde gıbbe ri‘âyeti şerâiti’l-kabûl şehâdetleri makbûle olup mûcibiyle ba‘de’l-hükm mâ-vaka‘a bi’t-taleb ketb olundu. Tahrîren fi’l-yevmi’s-sâmin aşer min şehri Ramazâni’l-mübârek li-sene seb‘a ve sittîn ve elf. Şühûdü’l-hâl: Ali Bey b. Ahmed, İsmail b. Yunus, Mehmed Çelebi b. Haydar, Mustafa b. Süleyman, İbrahim b. ( ) ve gayruhüm mine’l-[hâzırîn.]