Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 146 Hüküm no: 80 Orijinal metin no: [13b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mahmud b. Osman’ın haksız yere yolunu kapattığı iddiasıyla Kaya Çelebi b. Mehmed aleyhine açtığı davada iddiasını ispat edemediği Fi’l-asl Vilâyet-i Anadolu’da Trabzon sancağında Rize kazâsında Samro mahallesinde sâkin Mahmud b. Osman nâm kimesne meclis-i şer‘-i hatîrde mahalle-i mezbûre sükkânından işbu bâ‘isü’l-vesîka Kaya Çelebi b. Mehmed mahzarında üzerine da‘vâ ve takrîr-i kelâm edip mezbûr Kaya Çelebi benim sâkin olduğum menzilimden kendim ve hayvanâtım mer‘âya ve sâir mesâlih-i mühimme için mürûr ve ubûr edecek tarîkimi sed edip kendi menziline ilhâk etmekle hâlâ menzil-i mezbûrdan hakk-ı mürûrum olup menziline ilhâk eylediği tarîkimden mezkûr Kaya Çelebi’ye kasr-ı yedine tenbîh olunmak matlûbumdur dedikde gıbbe’s-suâl ve akībe’l-inkâr müdde‘î-i mezbûr Mahmud’dan müdde‘âsını mübeyyine beyyine taleb olundukda ityân-ı beyyineden izhâr-ı acz edip istihlâf etmeğin fi’l-vâki‘ müdde‘î-i mezbûr Mahmud’un sâkin olduğu menzilinin mürûr u ubûr eden tarîkini sed ve menziline ilhâk etmediğine mezbûr Kaya Çelebi’ye yemîn teklîf olundukda ol dahi alâ vefki’l-mes’ûl yemîn billâhi’l-aliyyi’l-azîm etmeğin mâ-hüve’l-vâki‘ bi’t-taleb ketb olundu. Fi’l-yevmi’s-sâmin min şehri Ramazâni’l-mübârek li-sene seb‘a ve sittîn ve elf. Şühûdü’l-hâl: Mehmed b. Osman, Mahmud b. Osman, İsmail b. Yunus, Osman Beşe çukadâr, Kaya Beşe b. Mehmed, Mustafa Çelebi b. Mehmed, Çavuşzâde Mehmed Çelebi b. Ali ve gayruhüm mine’l-[hâzırîn.]