Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 147 Hüküm no: 81 Orijinal metin no: [13b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sefine Reisi Mehmed b. Veli’nin miri tarafından zaptedilen gemisini kurtarmak için Ahmed Çelebi b. Dilaver’e verdiği rüşveti geri istemekte haksız olduğu Fazîletlü efendi hazretlerinin imzâsıyladır. Sefîne reîslerinden Mehmed b. Veli nâm kimesne dîvân-i ma‘delet-unvânda ma‘kūd mahfil-i kazâda mahrûse-i Galata a‘mâlinden kasaba-i Tophane’de Cihangir mahallesinde sâkin işbu râfi‘ü’l-kitâb Ahmed Çelebi b. Dilaver mahzarında üzerine takrîr-i da‘vâ edip bundan akdem mülküm olan sefînem mîrî tarafından girift olunmağla tahlîsi için alâ tarîkı’r-rüşve mezbûr Ahmed Çelebi’ye kırk beş kıt‘a riyâlî guruş def‘ ve teslîm ol dahi ahz u kabz etmişidi hâlâ meblağ-ı mezbûru mezkûr Ahmed Çelebi’den istirdâd ederin suâl olunsun dedikde gıbbe’s-suâl mezbûr Ahmed Çelebi cevâbında müdde‘î-i mezbûrun vech-i muharrer üzere sefînesi mîrî [tarafından] girift olunup mezbûr Mehmed sefînemi tahlîs etmek için gāib ani’l-meclis Hazîne Kâtibi Sinan Çelebi benden kırk beş riyâlî guruş taleb ediyor tarafımdan meblağ-ı mezbûru mezkûr Sinan Çelebi’ye ver sefînemi tahlîs eyle deyu emr ve bana kırk beş riyâlî guruş verip ben dahi ba‘de’l-ahz meblağ-ı mezbûr kırk guruşu mezbûr Sinan Çelebi’ye tamâmen teslîm edip ol dahi ahz ve müdde‘î-i mezbûrun sefînesini tahlîs eyledi ol vechile yedimde bir şey kalmamışdır deyu kırk guruşu def‘le mukābile ve beş guruş ziyâde kabzını münkir oluncak gıbbe’l-istintâk ve’l-inkâr mezbûr Ahmed Çelebi’den def‘-i mezbûrun mübeyyine beyyine taleb olundukda udûl-i Müslimînden olup kasaba-i mezbûre[de] Mehmed Ağa mahallesi sükkânından Ahmed b. Mehmed ve Mustafa b. Hüseyin nâm kimesneler li-ecli’ş-şehâde meclis-i şer‘a hâzırân olup isre’l-istişhâd fi’l-vâki‘ müdde‘î-i mezbûr Mehmed sefînesi mîrîye girift olundukda gāib-i mezbûr Sinan Çelebi sefînemi tahlîs için benden kırk beş riyâlî guruş taleb ediyor tarafımdan meblağ-ı mezbûru mezkûr Sinan Çelebi’ye ver ve sefînemi tahlîs eyle deyu mezbûr Ahmed Çelebi huzûrumuzda emir ve meblağ-ı mezbûr kırk beş riyâlî guruşu mezkûr Sinan Çelebi’ye vermek için mezbûr Ahmed Çelebi’ye def‘ ve teslîm eyledi biz bu husûsa şâhidleriz şehâdet dahi ederiz deyu edâ-i şehâdet-i şer‘iyye eylediklerinde ba‘de ri‘âyeti şerâiti’l-kabûl şehâdetleri makbûle olmağın mûcebince meblağ-ı mezbûr kırk beş guruş mu‘ârazasından men‘ ve ziyâde beş guruşu müdde-i mezbûra teslîme mezbûr Ahmed Çelebi’ye tenbîh olunup mâ-vaka‘a bi’t-taleb ketb olundu cerâ zâlike ve hurrire. Fi’l-yevmi’s-sâbi‘ aşer min şehri Ramazâni’l-mübârek li-sene seb‘a ve sittîn ve elf. Şühûdü’l-hâl: Ahmed Çelebi b. Mehmed el-yesârî, Mehmed b. Ahmed el-bevvâbü’s-sultânî, İvaz Ağa ser-muhzırân, Mehmed Çelebi b. Eyüb, Ebûbekir b. Ömer, Mehmed Efendi el-kâtib, Süleyman Çelebi el-kâtib, Ali Efendi ve gayruhüm mine’l-[hâzırîn.]