Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 152 Hüküm no: 87 Orijinal metin no: [14b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Amine bt. Murad’ın sattığı cariye bedelinden Esirci Mahmud b. Veli’den yirmi guruş alacağı olduğu Medîne-i Üsküdar’da Geredeli mahallesinde sâkine Âmine bt. Murad nâm hâtunun vâlidesi ve tarafından husûs-ı âti’l-beyâna vekîl-i sâbitü’l-vekâlesi olan Hadice bt. Mehmed meclis-i şer‘-i hatîr-i lâzimü’t-tevkīrde esirci tâifesinden Mahmud b. Veli mahzarında üzerine takrîr-i da‘vâ edip müvekkilem mezbûre Âmine Hâtun târih-i kitâbdan yedi ay mukaddem yedinde mülk ve hakkı olup evsâfı beynlerinde ma‘lûm Kâmile nâm Rusiyye câriye-i memlûkesini mezkûr Mahmud’a altmış riyâlî guruşa bey‘ ve teslîm edip ol dahi iştirâ ve tesellüm eyleyip semeni olan meblağ-ı mezkûru vekâletim hasebiyle taleb ederim suâl olunsun dedikde gıbbe’s-suâl mezbûr Mahmud cevâbında müvekkile-i mezbûre Âmine Hâtun zikrolunan câriyesini târih-i mezkûrda âhara bey‘ etdirmek için def‘ ve teslîm edip ben dahi mahmiye-i İstanbul’da Küçükkaraman’da vâki‘ Pirinçcizâde Odaları’nda sâkin Abdüsselâm nâm kimesneye kendi ile ma‘an varıp müvekkile-i mezkûre Âmine Hâtun câriye-i mezkûreyi mezbûr Abdüsselâm’a yetmiş riyâlî guruşa bey‘ edip ol dahi yedinden iştirâ ve kabz eyledikden sonra semeni olan meblağ-ı mezkûrdan ancak bana yirmi riyâlî guruş def‘ ve teslîm eyledi mezbûr semen-i mezkûr yetmiş guruşdan yirmi riyâlî guruşu ahz u kabz edip kendi masârıfına istihlâk eylediğini bi-tav‘ihî ikrâr ve i‘tirâf etmeğin ikrârı mûcebince zikrolunan yirmi guruşu vekîle-i mezkûre Hadice Hâtun’a edâ ve teslîme mezbûr Mahmud üzerine ilzâm-ı şer‘î olunup mâ-hüve’l-vâki‘ bi’t-taleb ketb olundu. Tahrîren fi’l-yevmi’l-ışrîn min şehri Ramazâni’l-mübârek li-sene seb‘a ve sittîn ve elf. Şühûdü’l-hâl: Ahmed Beşe b. Bâli, İbrahim Beşe b. ( ), Çukadâr Osman Beşe ve gayruhüm mine’l-[hâzırîn.]