Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 152 Hüküm no: 88 Orijinal metin no: [14b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kemhâcı Mustafa Çelebi b. Mehmed’in kirada oturduğu evin tamiri için harcadığı parayı ev sahibesi Saraylı Revane Hatun’dan talep etmekten vazgeçtiği Husûs-ı âti’l-beyânın mahallinde tahrîri iltimâs olunmağın savb-ı şer‘den Mevlânâ Keşfî Mustafa Efendi irsâl olunup ol dahi mahmiye-i İstanbul’da Koca Mustafa Paşa kurbünde Ali Fakih mahallesinde vâki‘ Saraylı Revane Hâtun bt. Abdülmennân’ın menziline varıp zeyl-i rakīmde muharrerü’l-esâmi Müslimîn ile akd-i meclis-i şer‘-i şerîf eyledikde mezbûre Saraylı Revane Hâtun’un mahalle-i mezbûrede vâki‘ âhar menzilinden beher şehr doksanar akçe icâre ile müste’ciri olan Kemhâcı Mustafa Çelebi b. Mehmed nâm kimesne meclis-i ma‘kūd-ı mezbûrda râfi‘atü’l-vesîka mersûme Saraylı Revane Hâtun mahzarında bi-tav‘ihî ikrâr ve takrîr-i kelâm edip merkūme Saraylı Revane Hâtun’un sâkin ve müste’ciri olduğum işbu menzilinden emri ile müceddeden beşer yüz akçe kıymetli iki kenîf ve iki pencere kanadı ve bin akçeye dahi fevkānî sofanın önüne üç kafes ve tahtânî bir odaya otuz aded cam ve havluda bir tahta perde binâ ve sâir mertebe muhtâc olan mevâzi‘i dahi imâret ve meremmet edip malımdan cem‘an harc u sarf eylediğim iki bin akçeyi hâlâ mezbûre Saraylı Revane Hâtun’dan taleb ve da‘vâ eylediğimde ol dahi cevâbında sen benim emrim yoğiken menzil-i mezbûrun bir tahtânî odasının tûlen ve arzan otuz zirâ‘ tavânını kal‘ eyledikden mâ‘adâ mârrü’z-zikr odayı kemhâ kârhânesi itmekle kemhâ destgâhı komak için duvarları dibini kazdığından nâşî zikrolunan odanın duvarları inhidâma müşrif olmuşdur deyu ve bâlâda zikrolunan binâ ve meremmet emrini bi’l-külliye inkâr etmekle beynimizde münâza‘ât-ı kesîre vâkı‘a olmuşidi el-hâletü hâzihî ben menzil-i mezbûra harc u sarf eylediğim cem‘an meblağ-ı mezbûr iki bin akçeyi teberru‘ edip meblağ-ı mezbûr ve ebniye-i merkūmeye müte‘allika cemî‘ de‘âvî ve mutâlebâtdan mezbûre Saraylı Revane Hâtun’un zimmetini ibrâ-i âmm-ı kātı‘u’n-nizâ‘la ibrâ ve ıskāt edip ol dahi vech-i muharrer üzere da‘vâ-yı mezbûresinden beni ibrâ-i âm ile ibrâ ve ıskāt eyledi dedikde gıbbe’t-tasdîkı’l-mu‘teber vâki‘-i hâli mevlânâ-yı mezbûr mahallinde tahrîr ve ba‘dehû ma‘an ba‘s olunan İbrahim Bey b. Ömer ve Ali b. Ahmed ile meclis-i şer‘a gelip vukū‘u üzere inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’l-hâdî ve’l-ışrîn min şehri Ramazâni’l-mübârek li-sene seb‘a ve sittîn ve elf. Şühûdü’l-hâl: Ahmed Efendi b. Mehmed el-imâm, Yahya Halîfe el-müezzin, Mahmud Ağa b. Hasan Halîfe, Ebûbekir Beşe b. İsmail, Ahmed Ağa b. Abdullah, Osman b. Sefer, Mehmed b. Abdullah, Receb Beşe b. Musa, Ali Beşe b. Muharrem, Mehmed b. Zülfikar ve gayruhüm mine’l-[hâzırîn.]