Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 157 Hüküm no: 94 Orijinal metin no: [15a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haydar b. Sefer’in kereste bedelinden Hüseyin Beşe b. Ebibekir’e 34.300 akçe borcu olduğunu ikrar ettiği Mahmiye-i İstanbul’da Kalenderhâne mahallesi ahâlîsinden olup keresteci tâifesinden Hüseyin Beşe b. Ebîbekir meclis-i şer‘-i hatîr-i lâzimü’t-tevkīrde mahmiye-i mezkûrede Haydarhâne mahallesi ahâlîsinden Haydar b. Sefer mahzarında üzerine takrîr-i da‘vâ edip mezkûr Haydar zimmetinde cins ve adedi beynimizde ilm-i şer‘î ile ma‘lûm yedimden müşterâ ve makbûz kereste semeninden elli bin fıddî râyic fi’l-vakt akçe hakkım olup meblağ-ı mezbûrun on beş bin yedi yüz akçesini mukaddemâ mezbûr Haydar yedinden ahz ve istîfâ edip mâ‘adâsı olan otuz dört bin üç yüz akçe hakkım hâlâ zimmetindedir suâl olunup alıverilmesi matlûbumdur dedikde gıbbe’s-suâl mezbûr Haydar cevâbında fi’l-hakīka müdde‘î-i mezbûr Hüseyin Beşe’ye yedinden müşterâ ve makbûz beynimizde kereste semeninde elli bin akçe deynim olup meblağ-ı mezbûrun on beş bin yedi yüz akçesini mukaddemâ kendiye edâ ve îfâ edip mâ‘adâsı olan otuz dört bin üç yüz akçe müdde‘î-i mezbûr Hüseyin Beşe’ye zimmetimde lâzimü’l-edâ deynimdir deyu bi’t-tav‘i’s-sâf ikrâr ve i‘tirâf edicek ikrârı mûcebince meblağ-ı bâkī-i mezbûr otuz dört bin üç yüz akçeyi müdde‘î-i mezbûra edâ ve teslîme mezbûr Haydar üzerine ilzâm-ı şer‘î olunup mâ-hüve’l-vâki‘ bi’t-taleb ketb olundu. Tahrîren fi’l-yevmi’s-sânî ve’l-ışrîn min şehri Ramazâni’l-mübârek li-sene seb‘a ve sittîn ve elf. Şühûdü’l-hâl: Mehmed b. Musa, Ahmed Çelebi b. Abdülkerim, el-Hâc Ca‘fer b. Abdullah, İsa Bey b. Ahmed ve gayruhüm.