Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 157 Hüküm no: 95 Orijinal metin no: [15b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Evliyazâde Hanife Hatun’un bazı eşyalarını gizlice aldığı iddiasıyla kocası Mehmed Çelebi b. Mehmed aleyhine açtığı davada; davalının ikrar ettiklerinin iadesi ve inkar ettiklerinin ispatı için davacıya süre verilmesi Mahmiye-i İstanbul’da Hoca Üveys mahallesinde sâkine olup Evliyazâde demekle şehîre olan Hanife Hâtun tarafından zikri âtî husûmete vekîl olup vekâleti mahalle-i mezbûre sükkânından mezbûreyi ma‘rifet-i şer‘iyye ile ârifân olan Yusuf b. Ali ve Ahmed b. Halil nâm kimesneler şehâdetleri ile şer‘an sâbite olan umdetü kuzâti’l-İslâm Ali Efendi b. el-Hâc Mustafa meclis-i şer‘-i hatîr-i lâzimü’t-tevkīrde müvekkile-i mezbûre Hanife Hâtun’un zevci olan Mehmed Çelebi b. Mehmed mahzarında bi’l-vekâle üzerine takrîr-i da‘vâ edip merkūm Mehmed Çelebi müvekkile-i merkūme Hanife’nin mülkü ve hakkı olan otuz guruş kıymetli bir altınlı mak‘adı ve yirmi guruş kıymetli bir Mushaf-ı şerîfi ve on guruş kıymetli iki orta Selanik keçesini ve iki yüz akçe [kıymetli] bir Kula seccâdesini ve yüz yirmişer akçe kıymetli beş tâne ayaklı sahanını ve üç [yüz] akçe kıymetli bir kebîr bakır sinisini ve yetmiş guruş kıymetli bir mücevher nîm kuşağını ve on guruş kıymetli bir sîm kılabdanını ve on guruş kıymetli bir sîm buhûrdânını ve on guruş kıymetli bir sîm kutusunu ve otuz guruş kıymetli bir zümrüd hâtemini ve on guruş kıymetli bir tılsımını ve yüz guruş kıymetli bir mücevher kuşağını ve on beş guruş kıymetli bir altın bileziğini ve on guruş kıymetli bir la‘l hâtemini ve beş guruş kıymetli bir nakışlı çârşebini ve otuz guruş kıymetli altı dal incisini hufyeten ahz eylemişdir suâl olunup eşyâ-i mezkûrenin aynıları mevcûd ise aynılarını istihlâk eyledi ise yevm-i istihlâkinde kıymet-i meşrûhalarının merkūm Mehmed Çelebi’den alıverilmesin taleb ederim dedikde gıbbe’s-suâl merkūm Mehmed Çelebi cevâbında bundan akdem zevcem merkūmeden bi’l-iktizâ bir mikdâr [akçe] istidâne recâsında olduğumda merkūme dahi silk-i mülkünde olan eşyâsından mârrü’z-zikr altın bileziğini ve incisini ve nısf mücevher kuşağını ve bir la‘l hâtemini ve bir sîm âyînesini ve bir nakışlı çârşebini bana rızâsı ile teslîm edip “var bu eşyâyı bir mikdâr akçe mukābile[sinde] rehin vaz‘ eyle” demesiyle ben dahi ba‘de’l-kabz bilezik ve kuşağı ve hâtemi Dergâh-ı âlî yeniçerileri odalarından beşinci ağa bölüğünün vakıf düzenleri akçesinden istidâne ve kabz ettiğim kırk riyâlî guruş mukābilesinde rehin vaz‘ ve teslîm edip ve [zikr] olunan inciyi ve sîm âyîne ve nakışlı çârşebini mahmiye-i mezbûrede Mahmudpaşa mahallesinde sâkin olup yeniçeri çavuşlarından olan (…) Çavuş yedinden istidâne ve kabz ettiğim yirmi riyâlî guruş mukābilesinde rehin vaz‘ ve teslîm eyledim deyu vekîl-i mezbûrun taleb ettiği eşyâ-i mevsûfe-i mezkûreden ancak bir tek altın bileziğini ve nısf kuşağı ve la‘l hâtemini ve altı dal inciyi ve çâreşebi ve [bir sîm] âyîneyi minvâl-i muharrer üzere ahz u kabzını i‘tirâf ve mâ‘adâyı bi’l-külliyye i‘tirâfı mûcebince merkūm Mehmed Çelebi eşyâ-i mezkûre (…) tahlîs ve müvekkile-i merkūmeye teslîme ba‘de’l-hükm vekîl-i merkūm Ali Efendi’den mâ‘adâyı mübeyyine beyyine taleb olundukda ityân-ı beyyine için ba‘de’l-istimhâl mehl-i şer‘î verilip mâ-hüve’l-vâki‘ bi’t-taleb ketb olundu. Fi’l-yevmi’l-hâdî aşer min şehri Ramazâni’l-mübârek li-sene seb‘a ve sittîn ve elf. Şühûdü’l-hâl: İsa Bey b. Ahmed el-muhzır, İsmail Çelebi b. Yunus, Eyyübî Ahmed Çelebi el-muhzır, Mehmed Çelebi b. Haydar el-muhzır ve gayruhüm mine’l-[hâzırîn.]