Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 158 Hüküm no: 96 Orijinal metin no: [15b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Beşe b. Mahmud’un merhum İbrahim Beşe zimmetinde kalan alacağının terekesinden ödenmesi Fazîletlü efendi hazretlerinin imzâsıyladır. Medîne-i Trabzon’da Meydan mahallesi sükkânından Mehmed Beşe b. Mahmud nâm râcil mahfil-i kazâda kazgancı tâifesinden olup bundan akdem vefât eden İbrahim Beşe b. İskender’in li-ebeveyn karındaşı [ve] vârisi olan Mehmed Beşe nâm râcil mahzarında üzerine takrîr-i da‘vâ edip mezbûr İbrahim Beşe zimmetinde cihet-i karz-ı şer‘îden yetmiş kıt‘a riyâlî guruş hakkım olup bana edâ etmedin zimmetinde iken fevt olmağın hâlâ meblağ-ı mezbûr tereke-i vâfiyyesinden bana alıverilmek matlûbumdur dedikde gıbbe’s-suâl ve akībe’l-inkâr müdde‘î-i mezbûrdan müdde‘âsını mübeyyine beyyine taleb olundukda udûl-i Müslimînden olup tâife-i mezbûreden Mehmed Beşe b. Mirzâ ve Berber el-Hâc Ahmed b. Abdullah nâm kimesneler li-ecli’ş-şehâde meclis-i şer‘a hâzırân olup isre’l-istişhâd fi’l-vâki‘ müteveffâ-yı mezbûr İbrahim Beşe hayâtında müdde‘î-i mezkûr Mehmed Beşe’den bizim huzûrumuzda yetmiş kıt‘a riyâlî guruş istikrâz ve kabz eyledi biz bu husûsa bu vech üzere şâhidleriz şehâdet dahi ederiz deyu herbiri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’ş-şer‘î mûcebince ba‘de’l-hükm mâ-vaka‘a bi’t-taleb ketb olundu. Fi’l-yevmi’l-ışrîn min şehri Ramazâni’l-mübârek li-sene seb‘a ve sittîn ve elf. Şühûdü’l-hâl: Mehmed Çavuş b. Mehmed Efendi, İsa Bey b. Ahmed, Hâcı Hüseyin, Ahmed Çelebi b. Abdurrahman, Ahmed b. Abdullah ve gayruhüm mine’l-[hâzırîn.]