Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 159 Hüküm no: 97 Orijinal metin no: [15b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Niko v. Savel’in amcası Toyo v. Niko aleyhinde açtığı tarla davasında haklı olduğu Vilâyet-i Rumeli’nde Boganya kazâsında Şepari nâm karye sâkinlerinden olup bundan akdem hâlik olan Savel v. ( ) nâm zimmînin oğlu Niko nâm zimmî meclis-i şer‘-i hatîr-i lâzimü’t-tevkīrde ammi bâ‘isü’l-kitâb Toyo v. Niko nâm zimmî muvâcehesinde bast-ı kelâm ve ta‘bîr ani’l-meram edip karye-i mezbûre sınırı dâhilinde vâki‘ bir tarafı Yani v. Kiro [ve] bir tarafı Niko v. Dedo ve bir tarafı Luka v. Niko nâm zimmîler bağlarına ve bir tarafı tarîk-ı âmma müntehî olup tahmînen beş keyl tohum isti‘âb eder tarla babam hâlik-i mezbûr Savel ile ammim mezbûr Toyo’nun ale’l-iştirâki’s-seviy taht-ı tasarruflarında olup babam mürd olmağın nısfının tasarrufu bana kānûnen intikāl etmişiken mezbûr Toyo’nun vâlidesi gāibe ani’l-meclis Kali bt. Duka nâm Nasrâniye zikrolunan tarlanın cümlesini karye-i mezbûreden gāib ani’l-meclis Marti v. Dedo nâm Nasrânîye bundan akdem üç yüz akçe bedel mukābilesinde fuzûlen tefvîz edip ol dahi tefevvüz ve bi-gayri vechin vaz‘-ı yed eylemişdir hâlâ suâl olunup ammim mezbûr Toyo’nın takrîri tahrîr olunması matlûbumdur dedikde gıbbe’s-suâl mezbûr Toyo cevâbında fi’l-hakīka zikrolunan tarlanın nısfı benim ve nısf-ı âharı karındaşım oğlu mezbûr Niko’nun tasarrufunda olup mezbûr Marti’nin alâka ve medhali yokdur dedikde hıfzan li’l-mekāl işbu hurûf ketb olunup yed-i men lehü’t-talebe def‘ olundu. Fi’l-yevmi’l-hâdî ve’l-ışrîn min şehri Ramazâni’l-mübârek li-sene seb‘a ve sittîn ve elf. Şühûdü’l-hâl: Miho v. Simo, Dimo v. Dimitri, Yani v. Kiro, Niko v. Miho, Duka v. Kiro ve gayruhüm mine’l-hâzırîn.