Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 160 Hüküm no: 98 Orijinal metin no: [15b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bayram Bey b. Şaban’ın mülk menzilinin varisleri tarafından on bin akçeye İsmail Beşe ve İbrahim Çelebi’ye satıldığı Fi’l-asl Bolu sancağında Yenice Eflağani kazâsına tâbi‘ Firuz nâm karyeden olup mahmiye-i İstanbul’da Yazıcı mahallesinde sâkin iken vefât eden Bayram Bey b. Şa‘ban’ın li-ebeveyn karındaşı Mehmed nâm kimesne ile kız karındaşı Âişe nâm hâtuna münhasıra olduğu şer‘an mütehakkık oldukdan sonra mezkûr Mehmed ve mezbûre Âişe’nin sadrî kebîr oğlu ve tarafından husûs-ı âti’l-beyâna vekîli olup mezbûreyi ma‘rifet-i şer‘iyye ile ârifeyn olan Mehmed b. Siyami ve Mustafa b. Mehmed şehâdetleri [ile] vekâleti sâbite olan Mehmed b. Sefer meclis-i şer‘-i hatîr-i lâzimü’t-tevkīrde kendi tarafında asîl ve kız karındaşı oğlu İbrahim Çelebi b. Yusuf tarafından ikrâr-ı âti’l-beyânı tasdîka vekîl olup bi-mâ-hüve nehcü’s-sübût şer‘an vekâleti sâbite olan İsmail Beşe b. Ali mahzarında herbiri asâleten ve vekâleten ikrâr ve i‘tirâf edip mûrisimiz müteveffâ-yı mezbûrun terekesinden olup mahalle-i mezkûrede vâki‘ bir tarafdan Aynî Hâtun bt. Mustafa mülküne ve bir tarafdan Âişe Hâtun mülküne ve iki tarafından tarîk-ı âmma muttasıl üç bâb fevkānî ve bir bâb tahtânî odaları ve bir su kuyusunu ve tahta-pûşu ve ahırı ve zât-ı eşcâr-ı müsmire ve bahçeyi ve kenîfi müştemil olup li’z-zekeri mislü [16a] hazzi’l-ünseyeyn irs-i şer‘le ikimize intikāl eden cemî‘ mülk [menzilimizi] kâffe-i hukūk ve merâfıkıyla mezkûrân İsmail Beşe ve İbrahim’e on bin fıddî râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm edip onlar dahi vech-i muharrer üzere iştirâ ve tesellüm eylediklerinden sonra semeni olan meblağ-ı mezkûr on bin akçeden li’z-zekeri mislü hazzi’l-ünseyeyn herbirimiz hisselerimize isâbet eden meblağı asâlet ve vekâletimiz hasebiyle mezkûrân İsmail Beşe ve İbrahim yedlerinden tamâmen ahz u kabz eyledik ba‘de’l-yevm menzil-i mahdûd-ı mezkûr mezbûrân İsmail Beşe ve İbrahim’in mülk-i müşterâsı ve hakk-ı sırfıdır keyfe mâ yeşâ ve yahtâr mutasarrıf olsunlar dediklerinde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Tahrîren fi’l-yevmi’s-sânî ve’l-ışrîn min şehri Ramazâni’l-mübârek li-sene seb‘a ve sittîn ve elf. Şühûdü’l-hâl: Hızır Çelebi b. Said, Sefer Ağa b. Abdullah, Hasan Bey b. Abdullah, Hasan Bey b. Maden, Osman Beşe b. Ahmed, es-Seyyid Osman b. es-Seyyid Hasan, Osman Beşe çukadâr, Süleyman Beşe b. Mustafa, Receb Bey b. Süleyman el-cündi ve gayruhüm mine’l-[hâzırîn.]