Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 161 Hüküm no: 99 Orijinal metin no: [16a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bayram Bey b. Şaban’ın varislerinden karısı Şerife bt. Seyyid Hasan’ın miras hususunda kaynı Mehmed Çelebi’nin zimmetini ibra ettiği Mahmiye-i İstanbul’da Yazıcı mahallesi sükkânından olup bundan akdem vefât eden Bayram Bey b. Şa‘ban nâm bevvâb-ı sultânînin verâseti zevce-i metrûkesi Şerife bt. es-Seyyid Hasan ve li-ebeveyn er karındaşı Mehmed Çelebi ve li-ebeveyn kız karındaşı Âişe’ye münhasıra olduğu mütehakkık oldukdan sonra merkūme Şerife meclis-i şer‘-i hatîr-i lâzimü’t-tevkīrde müteveffâ-yı mezbûrun li-ebeveyn karındaşı ve muhallefâtına vâzı‘u’l-yed olan bâ‘isü’l-kitâb merkūm Mehmed Çelebi mahzarında tâyi‘aten ikrâr ve takrîr-i kelâm edip zevcim müteveffâ-yı mezbûr Bayram Bey’in zimmetinde mütekarrir olan bin akçe mehr-i müeccelim ve ber-mûceb-i defter-i kassâm-ı askerî iki bin üç yüz akçe rub‘ hisse-i şer‘iyyemi cem‘an üç bin üç yüz akçe hakkımı merkūm Mehmed Çelebi yedinden tamâmen ahz u kabz edip zevcim müteveffâ-yı mezbûr Bayram Bey’in terekesine müte‘allika cemî‘ de‘âvî ve mutâlebât ve eymân ve muhâsamâtdan merkūm Mehmed Çelebi’nin zimmetini ibrâ-i âmm-ı kātı‘u’n-nizâ‘la ibrâ ve ıskāt eyledim min ba‘d merkūm Mehmed Çelebi ile müteveffâ-yı mezbûrun terekesine müte‘allika da‘vâ ve nizâ‘ım kalmadı dedikde merkūme Şerife’nin vech-i muharrer üzere cârî olan ikrârını merkūm Mehmed Çelebi bi’l-müvâcehe tasdîk ve tahkīk etmeğin mâ-vaka‘a bi’t-taleb ketb olundu. Tahrîren fi’l-yevmi’s-sânî ve’l-ışrîn min şehri Ramazâni’l-mübârek li-sene seb‘a ve sittîn ve elf. Şühûdü’l-hâl: İsamil Beşe b. Ali, Mehmed b. Budak, Mustafa b. Abdurrahman el-mücellid, Seyyid Osman b. es-Seyyid Hasan, İsmail Çelebi b. Yunus, Osman Beşe çukadâr, Mustafa Çelebi b. Habib ve gayruhüm.