Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 162 Hüküm no: 101 Orijinal metin no: [16a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacı Amir b. Hacı Mehmed’in Esirci Yusuf Beşe b. Satılmış’dan satın aldığı cariyenin ayıplı çıkması üzerine cariyeyi iade edip parasının kendisine teslimi Mahrûse-i Galata’da Azebkapısı dâhilinde sâkin işbu râfi‘ü’r-rakīm el-Hâc Âmir b. el-Hâc Mehmed meclis-i şer‘-i hatîrde esirci tâifesinden Yusuf Beşe b. Satılmış nâm râcil mahzarında üzerine da‘vâ ve takrîr-i kelâm edip mezbûr Yusuf Beşe işbu göğ elâ gözlü açık kaşlı orta boylu Gülbûy nâm Rusiyyetü’l-asl câriyesini târih-i kitâbdan yirmi gün mukaddem bana kendi mülküm olan Rusiyyetü’l-asl yetmiş riyâlî guruş kıymetli Şahbaz nâm câriye ile otuz kıt‘a riyâlî guruşa bey‘ ve teslîm ben dahi iştirâ ve tesellüm ve def‘-i semen-i mezbûr eyledikden sonra hâlâ ben câriye-i mezbûre Gülbûy’un sar‘a marazı olduğu ayb-ı kadîmine muttali‘ olup inde’t-tüccâr noksân semen îcâb eder uyûbdan olmağla hâlâ mezbûre Gülbûy merkūm Yusuf Beşe’ye red olunup kendiye verdiğim câriye-i merkūme ile otuz guruşunu bana teslîme mezbûr Yusuf Beşe’ye tenbîh olunmak matlûbumdur dedikde gıbbe’s-suâl mezbûr Yusuf Beşe cevâbında câriye-i mezbûre Gülbûy’ı vech-i muharrer üzere müdde‘î-i mezbûra bey‘ini ve mezbûr Gülbûy’u[n] sar‘a marazına mübtelâ olduğunu ikrâr ve i‘tirâf edip lâkin müdde‘î-i mezbûr el-Hâc Âmir mezbûre Gülbûy’u ba‘de’l-iştirâ istifrâş ve vaty eylemişdir deyu def‘le mukābele edicek gıbbe’l-istintak mezbûr el-Hâc Âmir vech-i muharrer üzere merkūme Gülbûy’u vaty eylemediğini mu‘terif olmağla mâni‘-i red olup noksân semen lâzım gelmekle mûcibiyle câriye-i merkūme Gülbûy’un noksân semeni müdde‘î-i mezbûr el-Hâc Âmir’e teslîme mezbûr Yusuf Beşe’ye tenbîh olunup mâ-hüve’l-vâki‘ bi’t-taleb ketb olundu. Fi’l-yevmi’l-hâdî ve’l-ışrîn min şehri Ramazâni’l-mübârek li-sene seb‘a ve sittîn ve elf. Şühûdü’l-hâl: Hâcı Ali b. Abdünnur, Hâcı İbrahim b. Mehmed, Osman Beşe çukadâr, Mehmed b. Haydar, İsa Bey b. Ahmed ve gayruhüm mine’l-[hâzırîn.]