Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 166 Hüküm no: 105 Orijinal metin no: [16b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Niko v. Savel’in bir menzil ile bazı eşya ve hayvanlardaki yarım hissesini Toyo v. Niko’ya iki bin altı yüz akçeye sattığı Vilâyet-i Rumeli’nde Boganya kazâsına tâbi‘ Şepari nâm karye ahâlîsinden Niko v. Savel nâm zimmî meclis-i şer‘-i hatîr-i lâzimü’t-tevkīrde işbu bâ‘isü’r-rakīm Toyo v. Niko nâm zimmî muvâcehesinde tav‘an ikrâr ve i‘tirâf edip silk-i mülkümde münselik olup karye-i mezbûrede vâki‘ bir tarafı Dedo v. Dimo nâm zimmî mülküne ve bir tarafı Yani v. Kiro mülküne ve bir tarafı Dedo v. Milo mülküne ve bir tarafı tarîk-ı âmma müntehî cemî‘ mülk menzilimi kâffe-i hukūk ve merâfıkı ile ve iki aded bakır evânîmi ve bir vakıyye gümüş ve on iki re’s koyun ve iki re’s karasığır ineği ve iki re’s karasığır öküzünün nısf-ı şâyi‘i benim ve nısf-ı şâyi‘-i âharı mezkûr Toyo’nun mülk ve hakkı olmağla bundan akdem ben menzil-i mezkûrda ve eşyâ-i mezkûrede olan nısf-ı şâyi‘ hissemi mezkûr Toyo’ya iki bin altı yüz fıddî râyic fi’l-vakt akçeye bi-safkatin vâhidetin tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm edip ol dahi vech-i muharrer üzere nefsi’çün iştirâ ve kabûl ve tesellüm eyleyip semen-i mezbûr zimmetinde kalmışidi hâlâ semeni [18a] olan meblağ-ı mezbûr iki bin altı yüz akçeyi mezkûr Toyo bana def‘ ve teslîm edip ben dahi yedinden tamâmen ahz u kabz eyledim min ba‘d menzil-i mezbûrun ve eşyâ-i mezbûrenin mecmû‘u mezkûr Toyo’nun mülk ve hakkıdır ba‘de’l-yevm menzil-i mezkûrda ve eşyâ-i mezkûrede bi-vechin mine’l-vücûh da‘vâ ve nizâ‘ ve hak ve alâkam yokdur dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’l-ışrîn min şehri Ramazâni’l-mübârek li-sene seb‘a ve sittîn ve elf. Şühûdü’l-hâl: Mustafa Efendi b. Abdurrahman, Ahmed Efendi el-kādî, İsa Bey b. Ahmed ve gayruhüm mine’l-[hâzırîn.]