Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 174 Hüküm no: 119 Orijinal metin no: [18a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kurd b. Abdullah’ın Akçaabad kazasındaki bazı emlakının varisleri tarafından yirmi guruşa Ali Beşe b. Mahmud’a satıldığı Trabzon Eyâleti’nde Akçaabad kazâsına tâbi‘ Hanbeti nâm karye ahâlîsinden iken vefât eden Kurd b. Abdullah nâm [kimesne]nin verâseti zevce-i metrûkesi Şâhî bt. ( ) nâm hâtuna ve sulbiye kebîre kızları Nazlı ve Âişe ve Nisa nâm hâtunlara münhasıra olduğu şer‘an mütehakkık oldukdan sonra mezkûrât Şâhî ve Nazlı ve Âişe ve Nisa taraflarından husûs-ı âti’l-beyâna vekîl olup vekâleti mezkûrâtı ma‘rifet-i şer‘iyye ile ârifeyn olan Mehmed Beşe b. Abdullah ve Mehmed b. Veli şehâdetleri ile şer‘an sâbite olan Hasan Beşe b. Mehmed meclis-i şer‘-i hatîr-i lâzimü’t-tevkīrde işbu râfi‘ü’l-kitâb Ali Beşe b. Mahmud mahzarında bi’l-vekâle tav‘an ikrâr ve i‘tirâf edip müvekkilelerim mezkûrâta mûrisleri müteveffâ-yı mezkûr Kurd’dan irs-i şer‘le intikāl edip karye-i mezkûrede vâki‘ bir tarafdan Veli b. Abdullah mülküne ve bir tarafdan mezbûr Ali Beşe mülküne ve iki tarafdan tarîk-ı âmma müntehi olan mülk menzil yerini ve harman yerini ve samanlığı kâffe-i hukūk ve merâfıkıyla taraflarından bey‘a vekâletim hasebiyle mezbûr Ali Beşe’ye yirmi riyâlî guruşa bey‘-i bâtt-ı sahîh ile bey‘ edip ol dahi minvâl-i muharrer üzere iştirâ ve kabûl eyleyip semeni olan meblağ-ı mezbûru bi’t-tamâm yedinden ahz u kabz eylediğimden sonra zikrolunan menzil yerini ve harman yerini ve samanlığı mahallinde zabt u kabza mezkûr Ali Beşe’yi taslît eyledim dedikde vekîl-i mezbûr Hasan Beşe’yi vech-i muharrer üzere cârî ve sâdır olan ikrârında el-mukarru lehü’l-mezkûr Ali Beşe vicâhen ve şifâhen tahkīk edicek mâ-hüve’l-vâki‘ bi’t-taleb ketb olundu. Tahrîren fi’l-yevmi’l-ışrîn min şehri Ramazâni’l-mübârek li-sene seb‘a ve sittîn ve elf. Şühûdü’l-hâl: Mahmud Beşe b. Abdullah, İshak Beşe b. Abdullah, İbrahim Beşe b. Yahya, İbrahim Beşe b. Mehmed, Ali Beşe b. Mehmed, Bostan Beşe ve gayruhüm mine’l-[hâzırîn.]