Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 174 Hüküm no: 120 Orijinal metin no: [18a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Coye bt. Simon’un ölen kızının mirasındaki hissesi hususunda damadı Yasef v. Heider ile sulh olup zimmetini ibra ettiği Vilâyet-i Rumeli’nden medîne-i Ruscuk mahallâtından Yahudi mahallesinde sâkine iken hâlike olan Canle bt. Mosi nâm Yahudiyyenin verâseti zevc-i metrûkü Yasef v. Heider nâm Yahudiye ve vâlidesi Coye bt. Simon nâm Yahudiyyeye ve sadrî sagīr oğlu Hayim’e münhasıra olduğu şer‘an mütehakkık ve tereke-i hâlike-i mezkûreye zevci mezkûr Yasef vâzı‘u’l-yed olduğu [18b] zâhir ve mütebeyyin oldukdan sonra hâlike-i mezkûrenin vâlidesi mezkûre Coye meclis-i şer‘-i hatîr-i lâzimü’t-tevkīrde zevci mezkûr Yasef muvâcehesinde bi-tav‘ihâ ikrâr ve i‘tirâf edip kızım hâlike-i mezkûrenin terekesinden bi-hasebi’l-irsi’ş-şer‘î bana isâbet eden südüs hisse-i şer‘iyyemi tereke-i hâlike-i mezkûreden zevci mezbûr Yasef’den da‘vâ ve taleb etmekle beynimizde münâza‘ât-ı kesîre vâkı‘a olmuşdu el-hâletü hâzihî beynimize muslihûn tavassut edip südüs hisse-i şer‘iyyem mukābilesinde beni kızım hâlike-i mezkûrenin terekesinden şerâit-i sulhu câmi‘ mevâni‘den ârî tehârüc-i şer‘î tarîkı üzere yüz kırk riyâlî guruş üzerine sulh ettiklerinde ben dahi sulh-ı mezbûru kabûl edip bedel-i sulh olan meblağ-ı mezbûrun seksen beş guruşunu tarafımdan vekîlim olan işbu hâzır bi’l-meclis oğlum Şemail v. Mosi yedinden ahz u kabz edip mâ‘adâsı olan elli beş guruşu mezbûr Yasef yedinden ahz u kabz eyleyip tereke-i hâlike-i mezbûreden ben südüs hisse-i şer‘iyyem da‘vâsından mezbûr Yasef’in zimmetini ibrâ-i âmm-ı kātı‘u’n-nizâ‘la ibrâ ve ıskāt eyledim ba‘de’l-yevm kızım hâlike-i mezkûre Canle’nin terekesine müte‘allik zevci mezbûr Yasef üzerine bi-vechin mine’l-vücûh ve bi-sebebin mine’l-esbâb da‘vâ ve hakkım kalmadı dedikde mukırre-i mezkûre Coye’nin vech-i muharrer üzere cârî ve sâdır olan ikrârında el-mukarru lehü’l-mezkûr Yasef vicâhen tasdîk ve şifâhen tahkīk edicek mâ-hüve’l-vâki‘ bi’t-taleb ketb olundu. Tahrîren fi’l-yevmi’r-râbi‘ ve’l-ışrîn min şehri Ramazâni’l-mübârek li-sene seb‘a ve sittîn ve elf. Şühûdü’l-hâl: İsa Bey b. Ahmed, el-Hâc Ca‘fer b. Abdullah, İsmail b. Yunus ve gayruhüm mine’l-[hâzırîn.]