Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 175 Hüküm no: 121 Orijinal metin no: [18b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ermeni Laçin v. Nörsis’in Hüseyin Ağa b. Sefer’den yüz altmış beş guruş alacaklı olduğu Mahmiye-i İstanbul’da Dülbenci Hüsam mahallesinde sâkin bâ‘isü’s-sifr Laçin v. Nörsis nâm Ermeni meclis-i şer‘-i hatîr-i lâzimü’t-tevkīrde zahrü’l-eşbâh Hüseyin Ağa b. Sefer mahzarında üzerine da‘vâ ve takrîr-i kelâm edip mezbûr Hüseyin Ağa zimmetinde cihet-i deyn-i şer‘îden yüz on beş kıt‘a riyâlî guruş ve murâbahasından dahi elli riyâlî guruş ki cem‘an işbu yedimde olup hat ve hatemini hâvî deyn temessükü nâtık olduğu üzere yüz altmış beş riyâlî guruş hakkım olup hâlâ taleb eylediğimde edâda te‘allül eder suâl olunup alıverilmesi matlûbundur dedikde gıbbe’s-suâl mezbûr Hüseyin Ağa cevâbında vech-i muharrer üzere mazmûn-ı temessük-i mezbûru ikrâr edip lâkin benim zimmetimde müdde‘î-i mezbûr Laçin’e ancak seksen dokuz riyâlî guruş deynim olup mâ‘adâ olan yetmiş beş buçuk riyâlî guruşu ilzâm-ı ribh olunmamış murâbaha olmağla vech-i muharrer üzere ziyâde yetmiş beş buçuk riyâlî guruş ikrârımda kâzibim deyu müdde‘î-i mezbûr Laçin’e murâbaha olan elli riyâlî guruşdan ziyâde meblağ-ı mezbûr yirmi beş buçuk riyâlî guruşu dahi murâbaha olmayıp ol vechile mezbûr Hüseyin Ağa meblağ-ı mezbûr yirmi beş buçuk riyâlî guruş ikrârında kâzib ve kendisi dahi da‘vâsından mubtil değil idiğine müdde‘î-i mezbûr Laçin’e yemîn teklîf olundukda ol dahi hasbe’l-mes’ûl yemîn billâhi’l-lezî enzele’l-İncîle alâ İsa [aleyhi]sselâm etmeğin mûcibiyle murâbaha olan meblağ-ı mezbûr elli riyâlî guruşdan mâ‘adâ yüz on beş kıt‘a riyâlî guruşu müdde‘î-i mezbûr Laçin’e edâ ve teslîme mezbûr Hüseyin Ağa’ya tenbîh olunup mâ-vaka‘a bi’t-taleb ketb olundu. Fi’l-yevmi’s-sânî ve’l-ışrîn min şehri Ramazâni’l-mübârek li-sene seb‘a ve sittîn ve elf. Şühûdü’l-hâl: Yusuf Beşe b. Mustafa el-mübâşir, İsmail b. Yunus, Osman Beşe çukadâr, Mehmed b. Haydar ve gayruhüm mine’l-[hâzırîn.]