Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 176 Hüküm no: 122 Orijinal metin no: [18b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tohdara bt. Mandek’in babasından intikal eden Eğin kazasına bağlı Vank köyünde bulunan bazı emlakindeki kendi hissesini kardeşi Etem’e sattığı Vilâyet-i Anadolu’da Eğin kazâsında Vank nâm karye sâkinlerinden iken bundan [akdem] hâlik olan Mandek v. ( ) nâm Ermeni’nin verâseti sulbî kebîr oğlu Etem nâm Ermeni ile sulbiye kebîre kızları Tohdara ve Marta nâm Ermeniyelere münhasıra olduğu şer‘an zâhir ve mütehakkık oldukdan sonra mezbûre Tohdara’nın zevci ve tarafından husûs-ı âtîyi ikrâra vekîl olup Erihan v. Bağdasar ve Marat v. Ağnasab nâm Ermeniler şehâdetleri [ile] şer‘an vekâleti sâbite olan Baron v. Agop meclis-i şer‘-i hatîr-i lâzimü’t-tevkīrde müvekkile-i mezbûrenin li-ebeveyn karındaşı işbu râfi‘ü’s-sifr mezbûr Etem muvâcehesinde bi’l-vekâle ikrâr ve takrîr-i kelâm edip hâlik-i mezbûrun mülkü karye-i mezbûrede vâki‘ bir tarafı Mustafa b. Abdullah bağı ve bir tarafı Erihan nâm Ermeni bahçesi ve bir tarafı Erşan bahçesi ve bir tarafı tarîk-ı âm ile mahdûd içinde bir odayı hâvî mülk tut bahçesi ve yine karye-i mezbûrede vâki‘ bir tarafı Melkon nâm Ermeni menziline ve bir tarafı Mihal Keşiş menziline ve bir tarafı Garel Keşiş menziline ve bir tarafı Ümid nâm zimmî menziline müntehî iki bâb odayı hâvî menzil ve yine karye-i mezbûrede vâki‘ bir tarafı Melkon nâm Ermeni bağı ve bir tarafı İncü bağı ve bir tarafı Markar bağı ve bir tarafı tarîk-ı âm ile mahdûd Susuzbağ demekle ma‘rûf bir kıt‘a mülk bağ ve yine karye-i mezbûrede vâki‘ bir tarafı Murad Nehri ve bir tarafı Melkon bağı ve bir tarafı Mihal Keşiş nâm zimmî bağı ve bir tarafı tarîk-ı âm [ile] mahdûd Sulubağlar demekle ma‘rûf iki kıt‘a mülk bağlar ba‘de helâkihî dört sehm i‘tibâr olunmağla iki sehmi mezbûr Etem’e ve birer sehmi müvekkile-i mezbûre ile merkūme Marta’dan herbirine isâbet ve intikāl etmişidi hâlâ zevcem müvekkile-i mezbûre Tohdara’ya emlâk-i mezbûrede olan bir sehm hisse-i şâyi‘asını tarafeynden îcâb ve kabûlü hâvî bey‘-i bâtt-ı sahîh-i şer‘î elli beş kıt‘a riyâlî guruş ile bir top al dârâyiye karındaşı mezbûr Etem’e bey‘ ol dahi vech-i muharrer üzere iştirâ ve kabûl eyledikden sonra semeni olan meblağ-ı mezbûr elli beş riyâlî guruş ile mârrü’l-vasf bir top âl dârâyiyi karındaşı mezbûr Etem yedinden tamâmen ahz u kabz eyleyip emlâk-i mezbûrede olan bir sehm hisse-i şâyi‘asını mahallinde kabz u tasarrufa taslît eyledi ba‘de’l-yevm emlâk-i mezbûrede olan bir sehm hisse-i şâyi‘ası karındaşı mezbûr Etem’in mülk-i müşterâsıdır dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’r-râbi‘ ve’l-ışrîn min şehri Ramazâni’l-mübârek li-sene seb‘a ve sittîn ve elf. Şühûdü’l-hâl: Ramazan Bey b. Sefer el-cündi, Mehmed Bey b. Sefer el-cündi, Ahmed b. Murad Beşe, Mustafa b. Nasûh, İsmail b. Yunus, Osman Beşe çukadâr, Mehmed Çelebi b. Haydar ve gayruhüm mine’l-[hâzırîn.]