Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 177 Hüküm no: 124 Orijinal metin no: [19a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Selime bt. Hasan’ın mirası hususunda varislerinden kardeşi oğlu Mehmed Çelebi’nin kocası Turgut Bey ile sulh olduğu Mahmiye-i İstanbul’da Oruc Gāzi mahallesinde sâkine iken bundan akdem vefât eden Selime bt. Hasan nâm hâtunun verâseti zevc-i metrûkü Turgud Bey b. Sefer nâm kimesneye ve li-ebeveyn karındaşı oğlu Mehmed Çelebi b. Hamza’ya münhasıra olduğu şer‘an zâhir ve müte‘ayyin oldukdan sonra mezbûr Mehmed Çelebi meclis-i şer‘-i hatîr-i lâzimü’t-tevkīrde işbu bâ‘isü’l-vesîka mezbûr Turgud Bey mahzarında ikrâr ve takrîr-i kelâm edip tereke-i müteveffât-ı mezbûreden olup mahalle-i mezbûrede vâki‘ bir tarafı Mehmed Paşa mülküne ve bir tarafı Muhzır Osman mülküne ve bir tarafı merhûm Muslihiddin Ağa odalarına ve bir tarafı tarîk-ı âmma müntehî dâhiliyesinde dört bâb odaları ve bir sofa ve bir kenîf ve bahçeyi ve hâriciyesinde iki bâb oda ve bir ahır ve bir bi’r-i mâ’î müştemil mülk menziline ve sâir esâs-ı beyt ve evânî-i nuhâsiyye ve gayr-ı nuhâsiyye bi’l-cümle ism-i mâl ıtlâk olunur cemî‘ eşyâsına mezbûr Turgud Bey vaz‘-ı yed eylemekle tereke-i müteveffât-ı mezbûreden bana isâbet eden nısf hisse-i şer‘iyyemi hâlâ mezbûr Turgud Bey’den taleb ve da‘vâ eylediğimde ol dahi menzil-i mahdûd-ı mezbûr ile müteveffât-ı merkūmenin sâir esâs-ı beyt ve evânî-i nuhâsiyye ve gayr-ı nuhâsiyye bi’l-cümle cemî‘ eşyâsından bana isâbet eden nısf hisse-i şer‘iyyem da‘vâsından beni şerâit-i sulhu hâvî ve mevâni‘den ârî tehârüc-i şer‘î tarîkı üzere otuz yedi bin nakd râyic fi’l-vakt akçe üzerine sulh eyledikde ben dahi sulh-ı mezbûru kabûl ve bedel-i sulh olan meblağ-ı mezbûr otuz yedi bin akçeyi tamâmen mezbûr Turgud Bey yedinden ahz u kabz edip tereke-i müteveffât-ı mezbûreden olup menzil-i mahdûd-ı mezbûr ile sâir esâs-ı beyt ve evânî-i nuhâsiyye ve gayr-ı nuhâsiyye ve bi’l-cümle huliy ve urûz ve menkūl kalîl ve kesîr ve celîl ism-i mâl ıtlâk olunur cemî‘ eşyâsından bana isâbet eden nısf hisse-i şer‘iyyeme müte‘allika cemî‘ de‘âvî ve mutâlebât ve eymân ve muhâsamâtdan mezbûr Turgud Bey’in zimmetini ibrâ-i âmm-ı kātı‘u’n-nizâ‘la ibrâ ve ıskāt eyledim eğer ba‘de’l-yevm tereke-i müteveffât-ı mezbûreye müte‘allika da‘vâ benden mezbûr Turgud Bey üzerine sudûr ve zuhûr ederse lede’l-hükkâmi’l-kirâm mesmû‘a ve makbûle olmaya dedikde gıbbe’t-tasdîkı’l-mu‘teber mâ-vaka‘a bi’t-taleb ketb olundu. Fi’l-yevmi’r-râbi‘ ve’l-ışrîn min şehri Ramazâni’l-mübârek li-sene seb‘a ve sittîn ve elf. Şühûdü’l-hâl: Mahmud Çelebi, Osman Çelebi b. Abdullah, Mehmed Halîfe, Osman b. ( ), Süleyman Çelebi, Ahmed Bey b. ( ), Yusuf Çelebi el-yesârî, Ahmed Çelebi yorgancı, Kaytas Bey b. Abdullah.