Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 185 Hüküm no: 132 Orijinal metin no: [20a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çaker Hatun bt. Abdullah’ın kendisini dövüp dişini çıkardığı iddiasıyla Hüseyin Bey b. Sefer aleyhine açtığı davada iddiasını ispat edemediği Mahmiye-i İstanbul’da Kurk Mahmud mahallesinde sâkine Çâker Hâtun bt. Abdullah meclis-i şer‘-i hatîr-i lâzimü’t-tevkīrde mahmiye-i mezbûrede Sofular mahallesi ahâlîsinden Hüseyin Bey b. Sefer mahzarında üzerine takrîr-i da‘vâ edip mezbûr Hüseyin Bey zimmetinde oğlum işbu hâzır bi’l-meclis olan Yahya’nın deyn-i şer‘îden beş yüz akçe hakkı olup meblağ-ı mezbûru taleb için oğlum mezbûr tarafından vekîl olmağla mezkûr Hüseyin Bey’in menziline varıp meblağ-ı mezbûru taleb eylediğimde beni yumruk ve depme ile urup yakamdan yapışıp yere çaldıkda üst dişlerimden bir dişimi çıkarmışdır suâl olunup bi-hasebi’ş-şer‘ mûcibi icrâ olunmak matlûbumdur dedikde gıbbe’s-suâl mezbûr Hüseyin Bey cevâbında mezbûre Çâker Hâtun meblağ-ı mezbûru taleb için menzilime gelip haddinden mütecâviz kelimât etmekle ben dahi mezbûreyi iki def‘a tabanca ile urdum deyu mezbûreyi tabanca ile urduğunu ikrâr edip minvâl-i meşrûh üzere yakasından yapışıp yere çaldığını ve dişini çıkardığını inkâr edicek mezbûre Çâker Hâtun[’dan] müdde‘âsını mübeyyine beyyine taleb olundukda ikāmet-i beyyineden izhâr-ı aczle istihlâf etmeğin müdde‘iye-i mezkûre Çâker Hâtun’u vech-i muharrer üzere yakasından yapışıp yere çalıp bir dişini çıkarmadığına mezbûr Hüseyin Bey’e yemîn teklîf olundukda ol dahi alâ vefki’l-mes’ûl yemîn billâhi’l-aliyyi’l-a‘lâ edicek mâ-hüve’l-vâki‘ bi’t-taleb ketb olundu. Tahrîren fi’l-yevmi’s-sâdis ve’l-ışrîn min şehri Ramazâni’l-mübârek li-sene seb‘a ve sittîn ve elf. Şühûdü’l-hâl: Ali b. Abdullah, Ya‘kub b. Şa‘ban, Hasan b. Abdullah, Hasan b. Seydi ve gayruhüm mine’l-[hâzırîn.]