Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 186 Hüküm no: 133 Orijinal metin no: [20a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed b. Hüseyin’in Opar kazasındaki bostan yeri hissesini haksızca zaptettiği iddiasıyla Piço v. Tanaş aleyhine dava açtığı Vilâyet-i Rumeli’nde Opar kazâsına tâbi‘ Merdşar nâm karye ahâlîsinden Ahmed b. Hüseyin meclis-i şer‘-i hatîr-i lâzimü’t-tevkīrde karye-i mezkûreden Piço v. Tanaş nâm zimmî mahzarında üzerine takrîr-i da‘vâ edip karye-i mezbûrede vâki‘ bir tarafdan Küçük Aydın nâm zimmî mülküne ve bir tarafdan mezbûr Piço’nın karındaşı Koka nâm zimmî mülküne ve iki tarafdan tarîk-ı âmma müntehî samanlık yerini ve bahçeyi müştemil olan bostan yerinin dört sehimden bir sehmi karındaşım gāib ani’l-meclis Ali nâm kimesnenin ve üç sehmi benim mülk ve hakkım olup karındaşım mezbûr Ali kendi mülk ve hakkı olan bir sehm-i şâyi‘ini mezbûr Piço’ya semen-i ma‘lûma bey‘ ve teslîm edip ol dahi zikrolunan bostan yerinden bir sehm-i şâyi‘ini iştirâ ve tesellüm eyledikden sonra benim mülk ve hakkım olan üç sehm-i şâyi‘imi dahi fuzûlen zabt u tasarruf eder suâl olunup zikrolunan bostan yerinden benim mülküm olan üç sehm-i şâyi‘imden yed-i âdiyyesi def‘ ve izâle olunmak matlûbumdur dedikde gıbbe’s-suâl mezbûr Piço cevâbında müdde‘î-i mezbûr Ahmed’in müdde‘âsı olan bostan yerinin dört sehimden bir sehm-i şâyi‘ini karındaşı mezbûr Ali bana bey‘ ve teslîm edip ve üç sehm-i şâyi‘ini li-ebeveyn karındaşım olup bundan akdem hâlik olan Koka nâm zimmîye on dört bin beş yüz akçeye bey‘ edip ol dahi vech-i muharrer üzere iştirâ eyledi zikrolunan bostan yerinin ancak dört sehimden bir sehm-i şâyi‘i benim mülküm olup mâ‘adâsında bir vechle alâka ve medhalim yokdur dedikde mâ-hüve’l-vâki‘ bi’t-taleb ketb olundu. Tahrîren fi’l-yevmi’s-sâmin ve’l-ışrîn min şehri Ramazâni’l-mübârek li-sene seb‘a ve sittîn ve elf. Şühûdü’l-hâl: Osman Çelebi muhzırbaşı, Ahmed Çelebi b. Abdülkerim, Osman Beşe çukadâr ve gayruhüm.