Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 186 Hüküm no: 134 Orijinal metin no: [20b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yusuf Beşe b. Mirza’nın sattığı cariye bedelinden Şerife Fâtıma Hatun bt. Ahmed’den yüz beş guruş alacağı olduğu İşbu bâ‘isü’r-rakīm Yusuf Beşe b. Mirzâ mahfil-i kazâda Şerife Fâtıma Hâtun bt. Ahmed mahzarında üzerine da‘vâ ve takrîr-i kelâm edip işbu hâzır bi’l-meclis Mustafa Beşe b. Ali nâm kimesne silk-i mülkünde orta boylu elâ gözlü Rusiyyetü’l-asl on dört yaşında Acemî bir câriyesini bey‘ edivermek için bana teslîm ben dahi ba‘de’l-ahz ve’l-kabz câriye-i mevsûfe-i mezbûreyi merkūme Şerife Fâtıma Hâtun’a târih-i kitâbdan beş gün mukaddem yüz beş kıt‘a riyâlî guruşa bâtten bey‘ ve teslîm ol dahi yedimden iştirâ ve kabûl ve tesellüm eyleyip semeni olan meblağ-ı mezbûr yüz beş riyâlî guruşu merkūme Şerife Fâtıma Hâtun’dan hâlâ taleb eylediğimde edâdan imtinâ‘ eder suâl olunup teslîme tenbîh olunmak matlûbumdur dedikde gıbbe’s-suâl ve akībe’l-inkâr müdde‘î-i mezbûr Yusuf Beşe’den müdde‘âsını mübeyyine beyyine taleb olundukda udûl-i Müslimînden olup mahmiye-i İstanbul’da Nuri Dede mahallesinde sâkin Mehmed Beşe b. Süleyman ve Kadıasker mahallesi sükkânından Ali Çelebi b. Hüseyin ve yine mahmiye-i mezbûrede merhûm Kara Mustafa Paşa Türbesi kurbünde Şahkulu Odaları’nda sâkin Pehlivan Yusuf b. Satılmış ve medîne-i Üsküdar’da Câmi‘-i kebîr mahallesinde sâkin Ali Beşe b. Turgud nâm kimesneler li-ecli’ş-şehâde meclis-i şer‘a hâzırûn olup isre’l-istişhâdi’ş-şer‘î fi’l-hakīka müdde‘î-i mezbûr Yusuf Beşe işbu hâzır bi’l-meclis Mustafa Beşe kendiye bey‘ edivermek için teslîm eylediği câriye-i mevsûfe-i mezbûreyi târih-i mezbûrda merkūme Şerife Fâtıma Hâtun’a bizim huzûrumuzda yüz beş kıt‘a riyâlî guruşa bâtten bey‘ ve teslîm ol dahi iştirâ ve kabûl ve tesellüm eyledi biz bu husûsa bu vech üzere şâhidleriz şehâdet dahi ederiz deyu herbiri edâ-i şehâdet-i şer‘iyye eylediklerinde şâhidûn-ı mezbûrûn mahalleleri ahâlîsinden sâbıkā atebe-i aliyyede başdefterdâr olan umdetü erbâbi’l-ikbâl kıdvetü ashâbi’l-iclâl Ali Efendi ve Mehmed Halîfe b. Mustafa ve el-Hâc Mehmed Efendi b. Mustafa el-müezzin ve Mahmud Efendi b. Mustafa el-müezzin ve Hüseyin Bey b. Yusuf ve Abdülmü’min Beşe b. İbrahim ve Hasan Çavuş b. Abdullah ve Ali Beşe b. Mehmed ve Esirci Hâcı Dilaver b. Abdullah nâm kimesnelerden suâl olundukda onlardan herbirisi dahi mezbûrûnun hüsn-i hâllerini ve makbûlü’ş-şehâde olduklarını haber verdiklerinden sonra şehâdetleri hayyiz-i kabûlde vâkı‘a olmağın mûcibiyle meblağ-ı mezbûr yüz beş riyâlî guruşu müdde‘î-i mezbûr Yusuf Beşe’ye edâ ve teslîme merkūme Şerife Fâtıma Hâtun’a tenbîh olunup mâ-hüve’l-vâki‘ bi’t-taleb ketb olundu. Fi’l-yevmi’s-sâbi‘ ve’l-ışrîn min şehri Ramazâni’l-mübârek li-sene seb‘a ve sittîn ve elf. Şühûdü’l-hâl: Ahmed Çavuş b. Ali, Seyyid İbrahim Çavuş b. Halil el-mübâşir, Salih Beşe b. Bayezid, Ali Beşe b. Turgud, Osman Beşe çukadâr, İsmail Çelebi b. Yunus, İsa Bey b. Ahmed ve gayruhüm.