Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 187 Hüküm no: 135 Orijinal metin no: [20b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Bey b. Mehmed’in alacağı olan yetmiş guruşu ödemesi için Süleyman Çavuş b. Mustafa’ya üç ay süre verdiği Mahmiye-i İstanbul’da Emin Sinan mahallesi ahâlîsinden Mustafa Bey b. Mehmed meclis-i şer‘-i hatîr-i lâzimü’t-tevkīrde mahmiye-i mezkûrede Yenibahçe kurbünde Karabaş mahallesi ahâlîsinden Süleyman Çavuş b. Mustafa mahzarında tav‘an ikrâr ve i‘tirâf edip mezbûr Süleyman Çavuş zimmetinde cihet-i deyn-i şer‘îden yüz riyâlî guruş hakkım olup meblağ-ı mezbûrun otuz guruşdan mezbûr Süleyman Çavuş’un zimmetini ibrâ-i âmm-ı kātı‘u’n-nizâ‘la ibrâ ve ıskāt eyledim mâ‘adâsı olan yetmiş riyâlî guruşu târih-i kitâbdan üç ay tamâmına değin te’cîl eyledim dedikde mukırr-ı mezbûr Mustafa Bey’i minvâl-i meşrûh üzere cârî ve sâdır olan ikrârında el-mukarru lehü’l-mezkûr Süleyman Çavuş vicâhen tasdîk ve şifâhen tahkīk ettikden sonra meblağ-ı müeccel-i mezkûr yetmiş riyâlî guruşun mecmû‘una mezbûr Süleyman Çavuş’un hâlâ zevcesi olup işbu hâzıratü bi’l-meclis olan Meryem bt. Abdullah nâm hâtun emr ve kabûlü hâviye kefâlet-i sahîha-i şer‘iyye ile kefîl oldum dedikde mâ-hüve’l-vâki‘ bi’t-taleb ketb olundu. Tahrîren fî selhi şehri Ramazâni’l-mübârek li-sene seb‘a ve sittîn ve elf. Şühûdü’l-hâl: Ahmed Çavuş b. Sinan, Mustafa Efendi Keşfî, Çukadâr Osman Beşe, İsa Bey b. Abdullah, İsmail Çelebi b. Yunus ve gayruhüm mine’l-[hâzırîn.]