Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 189 Hüküm no: 137 Orijinal metin no: [21a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Çelebi b. Halil Ağa’nın amcası Hüseyin Ağa b. Ali aleyhine açtığı alacak davasında iddiasını ispat edemediği Fazîletlü efendi hazretlerinin imzâsıyladır. Mahmiye-i İstanbul’da Sarı Bayezid mahallesi sükkânından Mustafa Çelebi b. Muameleci Halil Ağa meclis-i şer‘-i hatîrde li-ebeveyn ammisi sâhibü hâze’l-kitâb Hüseyin Ağa b. Ali mahzarında üzerine takrîr-i da‘vâ edip ammim mezbûr Hüseyin Ağa zimmetinde cihet-i deyn-i şer‘îden bin kıt‘a riyâlî guruş hakkım olduğundan mâ‘adâ ammim mezbûr Hüseyin babam müteveffâ-yı mezbûrdan irsle intikāl edip zimem-i nâsda olan bin kıta riyâlî guruşumu tarafımdan vekâleten ahz u kabz ve masârıfına sarfla istihlâk etmekle hâlâ zimmetinde iki bin riyâlî guruş hakkım vardır suâl olunup alıverilmesin taleb ederim dedikde gıbbe’s-suâl merkūm Hüseyin Ağa cevâbında fi’l-vâki‘ merkūm Mustafa Çelebi’ye cihet-i deyn-i şer‘îden bin riyâlî guruş deynim olduğundan mâ‘adâ babası müteveffâ-yı mezbûrdan irsle intikāl edip zimem-i nâsda olan bin riyâlî guruşunu dahi tarafından vekâlet ile ba‘de’l-kabz masârıfima sarfla istihlâk edip mezbûra iki bin riyâlî guruş deynim olmağla meblağ-ı mezbûrdan bin riyâlî guruşu Haremeyn-i şerîfeyn Vakfı’ndan zikrolunan Sarı Bayezid mahallesinde vâki‘ lede’l-ahâlî ma‘lûmü’l-hudûd vakıf menzilimi ma‘rifet-i mütevellî-i vakf-ı mezbûr ile bedel-i ma‘lûm mukābilesinde merkūm Mustafa Çelebi’ye ferâğ ve tefvîz edip ol dahi ba‘de’t-tefevvüz ve’t-tesellüm bedel-i menzil-i mezkûrdan bin riyâlî guruşunu merkūm Mustafa’ya vech-i meşrûh üzere deynim olan iki bin riyâlî guruşun bin riyâlî guruşuna takās ve meblağ-ı bâkī bin riyâlî guruşu dahi kendiye tamâmen teslîm edip ol dahi ba‘de’l-kabz babası merkūm Muameleci Halil Ağa’nın yevm-i fevtinden târih-i kitâb senesi şehri Rebî‘ülevveli’nin altıncı gününe değin merkūm Mustafa Çelebi’nin vasiyy-i muhtârı müteveffâ Hâfız Mehmed Efendi tarafından vekâlet ile mezbûr Mustafa Çelebi’nin babası terekesinden hissesine isâbet edip müdâhale ettiğim terekeye mezbûr Mustafa Çelebi ile babası müteveffâ-yı mezbûr ile beynimizde vukū‘ bulan mu‘âmelâta müte‘allik cemî‘ hukūk-ı ma‘lûme da‘vâsından berî olup benim zimmetimi ibrâ-i âmm-ı kātı‘u’n-nizâ‘la ibrâ ve ıskāt edip hattâ târih-i mezbûrda Rumeli kādıaskeri olan a‘lemü’l-ulemâ’i’l-izâm efdalü’l-fuzalâ’i’l-fihâm karmü’l-kurûm efdalü’r-Rûm fazîletli Şa‘ban Efendi hazretleri şer‘iyyâtcıları olan umdetü’l-müderrisîni’l-kirâm zübdetü’l-mütehakkıkīni’l-fihâm Mevlânâ Dıhkî Mustafa Efendi b. Mirzâ huzûrunda vech-i meşrûh üzere cemî‘ hukūk ve mu‘âmelât ve ahz u i‘tâya müte‘allika âmme-i de‘âvâdan berî olup zimmetimi ibrâ-i âmm-ı kātı‘u’n-nizâ‘la ibrâsını tav‘an ikrâr ve i‘tirâf ve yedime hüccet-i şer‘iyye vermişdir deyu târih-i mezbûr ile müverraha ve merkūm Hüseyin Ağa’nın takrîr-i meşrûhuna mutâbık ve mezbûrun ibrâsını hâviye ve mevlânâ-yı mûmâ-ileyhin imzâsı ile mümzât ve hatemi ile mahtûme hüccet-i şer‘iyye ibrâz edip muvâcehesinde feth ü kırâat ve istintâk olundukda merkūm Mustafa dahi cemî‘ mazmûn-ı hüccet-i mezkûreyi bi’l-külliyye ikrâr ve i‘tirâf edip ammisi mezbûr Hüseyin Ağa’yı kelimât-ı meşrûhasında tasdîk edicek mâ-hüve’l-vâki‘ bi’t-taleb ketb olundu. Fi’l-yevmi’s-sâlis ve’l-ışrîn min şehri Ramazâni’l-mübârek li-sene seb‘a ve sittîn ve elf. Şühûdü’l-hâl: Umdetü’l-müderrisîn Ali b. Sinan şer‘iyyâtî, Mefharü’l-a‘yân İvaz Ağa b. Hüseyin, Mefharü’l-emâsil Mehmed Ağa kethüdâ-yı kādıasker efendi, Salih Efendi b. Salih el-kâtib, Mehmed Efendi b. Veli el-kādî, Mustafa Çelebi b. Abdurrahman el-kādî, Mustafa Çelebi el-muhzır.